Инглиз тилида турғун ибораларнинг ўзига хос хусусиятлари

Тадқиқот ишининг методологик асоси сифатида Ўзбекистон Республикаси президенти И.А.Каримов асарлари ҳамда умумий тилшунослик, стилистика, лингвопрагматика, фразеология, фразеография, психолингвистика йўналишларида бир қатор етакчи олимларимиз (Ю.Ю.Авалиани, Н.Н.Амосова, Н.Д.Арутюнова, Т.А.Бушуй, И.Р.Гальперин, С.Н.Денисенко, Б.Й.Йўлдошев, А.В.Кунин, А.Маматов, И.М.Оницканская, М.И.Расулова, Л.И.Ройзензон, Л.П.Смит, В.Н.Телия, Н.К.Турниязов, М.И.Умархўжаев, Т.А.Dijk, P.Roberts, S.R.Searle, W.Tones ва бошқалар) асарлари хизмат қилди.
Ишнинг мақсад ва вазифалари тадқиқот усулларини белгилаб беради. Ишда фразеологик идентификация, дефиницион анализ, контекстуал анализ, қиёсий-чоғиштирма ва бошқа усуллардан фойдаланилган.
Тадқиқот ишининг предмети сифатида мақоллар ҳамда фразеологик бирликларнинг семантик механизми ва уларнинг луғатларда акс этиши кўриб чиқилади.
Тадқиқот объекти сифатида энг аввало инглиз тилининг образли, экспрессив ва эмоционал фразеологик бирликлари ва мақоллари олинган.
Тадқиқот материали сифатида фразеологик бирликлар, мақоллар, маталлар хизмат қилди. ФБлар мақоллар тўплами, ҳикматли сўзлар тўплами, фразеологик луғатлар, изоҳли луғатлар ва бошқа луғатлардан олинди.
Тадқиқот иши назарий ва амалий аҳамиятга эга бўлиб, бунда мақоллар ва фразеологик бирликларнинг семантик стилистик хусусиятларини, уларнинг луғатларда акс этиш жараёнини чуқур таҳлил қилиш паремиологияда системали алоқаларнинг вужудга келишига омил бўлади. Бу ишнинг асосий назарий ютуғи ҳисобланади. Бундан ташқари, фразеологизмларнинг номинатив жиҳатини ўрганиш бизга ономасиологик тадқиқотларнинг янги, ҳали яхши ўрганилмаган соҳасини яъни номинация умумий назариясини ўрганишга кенг йўл очиб беради ҳамда у ҳақидаги маълумотларнинг кўпайишига олиб келади.
Ишнинг амалий аҳамияти шундаки, тадқиқот натижаларидан ҳорижий тиллар факультетлари бакалавр ва магистрантларига дарс бериш жараёнида, инглиз тили фразеологияси бўйича назарий курслар тузишда, лексикография ва фразеография амалиётида, махсус фразеологик қўлланмалар тузишда фойдаланиш мумкин.