Induktiv juwaq shıǵarıw

Induktivlik oy juwmaǵın qollanıwdıń jetkilikli usılları tómendegilerden ibarat. Birinshi usıl retinde ulıwmalastırıw tiykarına qoyılǵan mısallardıń durıslıǵın tekseriwimiz kerek. Ekinshi usıl arqalı mısallardıń juwmaqqa qatnasınıń bar ekenligin anıqlawımız tiyis. Mısalı, aytayıq, qanday da bir A markalı sıya B, C markalı sıyaǵa salısırǵanda arzan turadı deyik. Budan A markalı sıya basqalarǵa salıstırǵanda paydalıraq degen juwmaqtı alǵan durıs emes, sebebi keltirilgen mısallar sapalıq jaqtan juwmaqqa tiyisli emes. Olar tek ǵana A markalı sıyanıń arzan ekenligi menen juwmaqqa qatnaslı. Basqa markalı sıyalardıń sapasınıń jaqsı bolıwı, olardı qollanıwdı paydalıraq qıladı. Úshinshi usıl mısallardıń jetkilikli dárejede beriliwin anıqlaw menen baylanıslı. Bul máseleniń sheshimi mısallardıń sanınan, tańlaw hám ózgertiw usıllarınan ǵárezli. Tórtinshi usıl tańlanǵan mısallardıń bir tipliligin anıqlawdan ibarat.
Solay etip, induktivlik oy juwmaǵı dep empirikalıq ulıwmalastırıw formasında, yaǵnıy jeke qubılıslarda belginiń qaytalanıwı tiykarında onıń qubılıslardıń belgili klasına tiyisli ekenligi haqqında juwmaq shıǵarıwshı oy juwmaǵına aytamız.
Induktivlik oy juwmaǵınıń tiykarları retinde ayırım qubılıslardıń kópshiliginde turaqlı qaytalanatuǵın belgi barlıǵı haqqındaǵı tájriybe jolı menen alınǵan maǵlıwmattı sáwlelendiretuǵın pikirler (S₁, S₂…S_n) qaraladı. Bul pikirler bir klassqa tiyisli bolıwı shárt hám ol tómendegishe sxemaǵa iye.

Tiykarlar: S₁ Pǵa iye

S₂ Pǵa iye
S_n Pǵa iye
S₁ S₂ S_n Kǵa tiyisli
_________________________________
Juwmaq: Knıń hár bir elementi Pǵa iye.
Solay etip, induktivlik oy juwmaǵı tájiriybelik izertlewdiń nátiyjelerin ulıwmalastırıwshı logikalıq operaciyalardı beredi.
Ulıwmalastırıwshı indukciya dep klasstıń jeke predmetleri haqqındaǵı bilimnen yamasa klasstıń podklassı haqqındaǵı bilimnen klasstıń hámme predmetleri haqqındaǵı bilimge yamasa klass haqqındaǵı bilimge ótiwdi támiynleytuǵın oy juwmaǵına aytamız. Ulıwmalastırıwshı indukciyanıń tolıq hám tolıq emes túrlerin bólip kórsetiwge boladı.