Илова “Заковат” интеллектуал ўйини бўйича

“Заковат интеллектуал клуби” ННТ Кенгашининг 2022 йил “___” августдаги
“___”-сонли баёнига
илова

“Заковат” интеллектуал ўйини бўйича

Марафон ўйинлари
НИЗОМИ


1-боб. Умумий қоидалар
1.1. Мазкур низом “Заковат интеллектуал клуби” нодавлат нотижорат ташкилоти томонидан Ўзбекистон Республикаси Президентининг 2022 йил 20 январдаги “Заковат” интеллектуал ўйинини аҳоли ўртасида оммавий-маърифий ҳаракатга айлантириш ва бошқа интеллектуал ўйинларни ривожлантиришга оид чора-тадбирлар тўғрисида”ги ПҚ-96-сонли қарорида кўрсатиб ўтилган вазифалар ижроси доирасида ташкил қилинувчи “Заковат” интеллектуал ўйини бўйича марафон ўйинларини (кейинги ўринларда – Марафон) ўтказиш тартибини белгилайди.
1.2. Марафон ўйинлари жорий йилнинг 14-август куни Бухоро, Гулистон, Фарғона, Урганч, Қарши шаҳарларида, 4-сентябрь куни Тошкент шаҳрида бўлиб ўтади.
1.3. “Заковат интеллектуал клуби” нодавлат нотижорат ташкилоти томонидан Марафонни ташкил этиш бўйича барча ташкилий ва ижодий ишларни мувофиқлаштириш, тайёргарлик кўриш ҳамда ўтказиш бўйича Ташкилий гуруҳ (кейинги ўринларда – ТГ) тузилади.


2-боб. Марафон иштирокчилари
2.1. Марафон “Заковат” интеллектуал клубининг “Заковат” ўйини бўйича мавсумий ўйинларида доимий иштирок этиб келаётган билимдонлар ўртасида ўтказилади.
2.2. 14-август кунги ўтказилувчи марафон ўйинларида:
Бухоро шаҳридагисида – Бухоро, Навоий вилоятлари;
Гулистон шаҳридагисида – Тошкент, Сирдарё, Жиззах вилоятлари;
Фарғона шаҳридагисида – Андижон, Наманган, Фарғона вилоятлари;
Урганч шаҳридагисида – Қорақалпоғистон Республикаси, Хоразм вилояти,
Қарши шаҳридагисида – Самарқанд, Сурхондарё, Қашақадарё вилоятлари билимдонлар иштирок этади.
2.3. Бухоро, Урганч шаҳарларидаги марафонларда тегишли ҳудудларда ўтказилаётган мавсумий ўйинларда жорий йилнинг 1 август ҳолатига рейтинг бўйича биринчи 5 та ўринни олган, Гулистон, Фарғона, Қарши шаҳарларидаги марафонларда эса биринчи 4 та ўринни олган жамоалар иштирок этади.