Илмий (ҳуқуқий) тадқиқот методологияси

Илмий (ҳуқуқий) тадқиқот методологияси

Казус. Илмий тадқиқот олиб боришда изланувчининг аналитик мулоҳаза юритиш қобилияти муҳим аҳамиятга эга.

Топшириқ: Тадқиқотчи учун аналитик мулоҳаза юритиш сифати қанчалик муҳим? Тадқиқот жараёнининг қайси босқичида аналитик мулоҳаза юритиш керак? Мутахассислик бўйича эгаллаган билимларингизга таяниб, келажакда юриспруденциянинг қайси соҳаси қандай талаб ва эҳтиёж туфайли ривожланишини башорат қила оласиз?
1-назарий савол. Илмий мавзу бу ечимини талаб қиладиган мураккаб вазифадир. Илмий тадқиқот мавзуси муайян илмий йўналишга ёки илмий муаммога тегишли бўлиши мумкин.
Тадқиқот мавзусини танлаш механизмларини тушунтиринг.
2-назарий савол. Юридик хулоса нима? У қандай ҳолатларда ишлаб чиқилади?


Конституциявий ҳуқуқ фанининг илмий-амалий муаммолари

Казус. Д.Маҳмудов 2020 йил 1 январь куни яқин дўстлари билан ўтказилган зиёфатда иштирок этди. Д.Маҳмудов зиёфатда мобиль телефонини стол устида қолдириб ташқарига чиқиб кетди. Бу орада зиёфатда иштирок этаётган К.Эргашев унинг телефонидан Телеграм дастури орқали бошқа шахс билан сўзлашувларини ўқиб чиқди.

Эртаси куни номаълум шахс Д.Маҳмудовга телефон қилиб унинг муҳим бир сиридан воқиф эканини айтди. Бироқ, Д.Маҳмудовга сирни ошкор қилиш билан боғлиқ ҳеч қандай таҳдид қилмади. Шунга қарамай, бундан хавотирга тушган Д.Маҳмудов ички ишлар органига мурожаат қилди. Д.Маҳмудов унинг сиридан воқиф бўлиш ниятида қасддан Телеграм дастури орқали бошқа шахс билан сўзлашувларини ўқиб чиққанлик ва бу орқали ўзганинг сиридан воқиф бўлганлик учун тегишли шахсларни топиб жавобгарликка тортишни сўради.
Бироқ, Д.Маҳмудовга ҳуқуқни муҳофаза қилувчи орган томонидан бошқа шахс билан сўзлашувларини қасддан ўқиб чиққанлик ва бу орқали ўзганинг сиридан воқиф бўлганлик учун ҳеч қандай жавобгарлик ўрнатилмагани айтилди. Бундан норози бўлган Д.Маҳмудов судга мурожаат қилди. Суд Ўзбекистон Республикасининг Конституциясида бировнинг ёзишмалар ва телефонда сўзлашувлар сирини ошкор этиш таъқиқланганини келтириб Д.Маҳмудовнинг талабини қаноатлантиришни рад этди. Бундан норози бўлган Д.Маҳмудов юқори турувчи судга апелляция тартибида шикоят қилди.