I bo‘lim. Umumiy qoidalar 1-bob. Asosiy qoidalar

376-modda. Tashqi savdo bojxona statistikasi
Tashqi savdo bojxona statistikasi O‘zbekiston Respublikasining tashqi savdo tovar aylanmasi bo‘yicha uning miqdori va qiymati ifodalangan, tizimlashtirilgan ma’lumotlar yig‘indisidan iboratdir.
Tashqi savdo bojxona statistikasining asosiy vazifalari davlat organlarini O‘zbekiston Respublikasi tashqi savdo tovar aylanmasining holati to‘g‘risidagi axborot bilan ta’minlash, O‘zbekiston Respublikasi Davlat budjetiga bojxona to‘lovlarining tushishini nazorat qilish, valyuta nazoratini va O‘zbekiston Respublikasi bojxona organlari zimmasiga yuklatilgan boshqa vazifalar amalga oshirilishini ta’minlashdan iborat.
377-modda. Maxsus bojxona statistikasi
Maxsus bojxona statistikasi bojxona organlari faoliyatining turli yo‘nalishlari bo‘yicha tizimlashtirilgan, tashqi savdo bojxona statistikasini yuritish bilan bog‘liq bo‘lmagan ma’lumotlar yig‘indisidan iboratdir.
Maxsus bojxona statistikasi bojxona organlarining faoliyatini o‘rganish, boshqaruvini tashkil etish va ushbu faoliyatni takomillashtirishning asosiy yo‘nalishlarini belgilash uchun yuritiladi.
54-bob. Bojxona ishida axborot-kommunikatsiya texnologiyalari
378-modda. Bojxona ishida axborot-kommunikatsiya texnologiyalaridan foydalanish
Bojxona ishi, qoida tariqasida, axborot-kommunikatsiya texnologiyalari asosida amalga oshiriladi.
Yuridik yoki jismoniy shaxslar, shu jumladan chet ellik shaxslar bojxona ishida boshqa davlat organlarining axborot tizimlari bilan o‘zaro hamkorlik qiluvchi bojxona organlarining axborot tizimlaridan foydalanishi mumkin.
Bojxona ishida axborot-kommunikatsiya texnologiyalaridan foydalanish axborot xavfsizligi talablariga rioya etilgan holda amalga oshiriladi.
379-modda. Bojxona ishida foydalaniladigan axborot resurslari
Bojxona ishida foydalaniladigan axborot resurslari bojxona organlarining axborot tizimlarida yaratiladigan, ishlov beriladigan va to‘plab boriladigan ma’lumotlar bazasini o‘z ichiga olgan hujjatlashtirilgan axborotning tashkil etilgan majmuidir.
Oldingi tahrirga qarang.
Bojxona organlarining ixtiyorida bo‘lgan axborot resurslari ochiqdir va ulardan hamma erkin foydalanishi mumkin, bundan ulardagi axborotdan foydalanish qonunchilikka muvofiq cheklangan hollar mustasno.
(379-moddaning ikkinchi qismi O‘zbekiston Respublikasining 2021-yil 21-apreldagi O‘RQ-683-sonli Qonuni tahririda — Qonunchilik ma’lumotlari milliy bazasi, 21.04.2021-y., 03/21/683/0375-son)