I bo‘lim. Umumiy qoidalar 1-bob. Asosiy qoidalar

55-bob. Axborot va maslahat berish
Oldingi tahrirga qarang.
380-modda. Bojxona to‘g‘risidagi qonunchilik to‘g‘risida axborot berish
Bojxona organlari umumjahon Internet tarmog‘idagi o‘z rasmiy veb-saytlarida joylashtirilgan bojxona to‘g‘risidagi qonunchilikka doir axborotdan shaxslarning moneliksiz foydalanishini ta’minlaydi.
Bojxona to‘g‘risidagi qonunchilik haqida axborot berish boshqa usul orqali ham amalga oshirilishi mumkin.
(380-modda O‘zbekiston Respublikasining 2021-yil 21-apreldagi O‘RQ-683-sonli Qonuni tahririda — Qonunchilik ma’lumotlari milliy bazasi, 21.04.2021-y., 03/21/683/0375-son)
381-modda. Bojxona organlarining vakolatlariga kiruvchi masalalar bo‘yicha maslahat berish
Bojxona organlarining mansabdor shaxslari manfaatdor shaxslarga bojxona ishi masalalari va bojxona organlarining vakolatlariga kiradigan boshqa masalalar yuzasidan maslahat beradi.
Bojxona organlarining mansabdor shaxslari tomonidan maslahat berish bojxona organlari joylashgan yerda va ularning ish vaqtida amalga oshiriladi.
Bojxona organlari tomonidan maslahat berish og‘zaki, elektron yoxud yozma shaklda bepul amalga oshiriladi.
Maslahat berishda manfaatdor shaxslarga taqdim etilgan axborot tovarlar va transport vositalariga nisbatan bojxona operatsiyalari amalga oshirilayotganda bojxona organlari tomonidan qaror qabul qilish yoki harakatni bajarish uchun asos bo‘lmaydi.
56-bob. Intellektual mulk obyektlariga bo‘lgan huquqlarni himoya qilish
382-modda. Intellektual mulk obyektlariga bo‘lgan huquqlarni himoya qilish borasida bojxona organlari tomonidan ko‘riladigan choralar
Bojxona organlari o‘z vakolatlari doirasida intellektual mulk obyektlariga bo‘lgan huquqlarni himoya qilish choralarini ko‘radi.
Bojxona hududiga olib kiriladigan va bojxona nazorati ostida turgan intellektual mulk obyektlariga bo‘lgan huquqlarning himoya qilinishini ta’minlash uchun bojxona organlari:
intellektual mulk obyektlariga bo‘lgan huquqlarning buzilganlik belgilari mavjud bo‘lgan tovarlarni chiqarib yuborishni to‘xtatib turishi;
intellektual mulk obyektlarini o‘z ichiga olgan tovarlarni chiqarib yuborishni to‘xtatib turish to‘g‘risidagi qarorni bekor qilishi mumkin.