Hozirgi o’zbek

Ҳолат (тарз) равишлари. Ҳаракатнинг қай ҳолатда, қай тарзда бажарилишини билдиради. Қандай, қай тарзда, қай ҳолатда сўроқларга жавоб бўлади: тез, секин, аста, пиёда, яёв, бирдан, тўсатдан, дўстона, янгича, ёнма-ён, юзма-юз, мардона, муздай, аста-секин.
Ҳолат равишлари равиш ҳоли, шунингдек, сифатловчи-аниқловчи, баъзан кесим вазифаларида келади.
Миқдор даража равишлари. Ҳаракат ва ҳолатнинг миқдорини билдириб қанча сўроғига жавоб бўлади: кўп, оз, анча, пича, сал, мўл, хийла, талай, роса, жиндай.
Даража равишлари: жуда, энг, ғоят, ғоятда, бениҳоят, ниҳоятда каби.
Бу равишлар ҳаракат ва белгининг ортиқлигини билдиради.
Миқдор-даража равишлари гапда асосан равиш ҳоли, кесим, отларга боғланиб аниқловчи бўлиб келади: оз сўз-соз сўз.
Ўрин равишлари. Ҳаракатнинг бажарилиш ўрнини билдириб, қаерда, қаердан сўроқларига жавоб бўлади: у ерда, шу ерда, ўнгда, чапда, тўғрида, олдинда, юқорида, орқада каби. Ўрин равишлари гапда ўрин ҳоли, баъзан кесим бўлиб келади.
Пайт равишлари. Ҳаракатнинг бажарилиш пайтини билдириб, қачон сўроғига жавоб бўлади: ҳозир, эрта индин, тушда, кечқурун, бугун, олдин, яқинда, кейин, кеча, ўтган йил каби.
Пайт равишлари гапда пайт ҳоли ва кесим вазифасида келади.
Сабаб равишлари. Ҳаракатнинг бажарилиши сабабини билдириб, нима учун, нима сабабдан сўроқларига жавоб бўлади: ноилож, иложсиз, чорасиз, чорасизликдан.
Сабаб равишлари гапда сабаб ҳоли вазифасида келади.
Мақсад равишлари. Ҳаракатнинг бажарилиш мақсадини билдириб, қандай, қай мақсадда сўроқларига жавоб бўлади: атай, атайин, атайлаб, қасддан, жўрттага. Мақсад равишлари гапда мақсад ҳоли вазифасида келади.
Равишлар сифатлардек даража ҳосил қилувчи -роқ қўшимчасини олади: кўпроқ, секинроқ каби.
Равишлар -гина (-кина, -қина) қўшимчалари билан қўлланилганда белгининг кучсизлиги, камлиги ифодаланади: камгина, секингина.