Madaniyatshunoslik (Kulturologiya) - Ma’naviyat sohasiga aloqador yo‘nalishdagi asosiy fanlardan bo‘lib, jahon va mintaqa madaniyatlarini inson ma’naviy faoliyatining hosilasi bo‘lmish mavjud voqe’lik sifatida olib o‘rganish ushbu fanning asosiy mavzusi (predmeti)ni tashkil etadi.
Milliy ma’naviyatimizning takomil bosqichlari - Millatning ma’naviy kamoloti uning butun tarixi davomida yuz beradi, u ba’zan shiddat bilan yuksalib borsa, ba’zan ma’lum darajada tanazzulga yuz tutishi, unda ba’zan asrlar kunlarga, va aksincha, kunlar asrlarga teng bo‘lishi mumkin. Ma’naviy takomil jarayonining o‘ziga xosligi shundaki, agar tarix hodisalari, shaxslar, voqealar o‘tkinchi bo‘lsa, moddiy madaniyat unsurlari vaqt o‘tishi bilan emirilsa, ma’naviyat esa yuksalib, boyib, tobora kengroq ko‘lam va teranroq mazmun kasb etib boraveradi. Millatning aksariyati ma’naviy tanazzulga yuz tutgan fojeiy sharoitlarda ham milliy ma’naviyat yo‘qolmaydi, ko‘lam va mazmunda o‘zi etishgan kamolot bosqichini yo‘qotmaydi. Milliy ma’naviyatimizning necha ming yillik takomili shartli ravishda uch yirik davrga bo‘linadi: 1. Islomgacha milliy ma’naviyatimiz taraqqiyoti. 2. Islom mintaqa madaniyati doirasida milliy ma’naviyatimiz takomili. 3. YAngi davrda milliy ma’naviyatimiz ahvoli. Bu davrlar o‘z qamrab olgan muddatlariga ko‘ra o‘zaro teng emas. Birinchi davr necha ming yilni qamrasa, ikkinchi davr 8-9 asrni o‘z ichiga oladi, uchinchi davr esa bizning o‘lkamiz - Turkiston uchun 5 asr chamasi davom etib, oxirgi 200 yili ko‘proq fojialarga to‘liq bo‘ldi. Bu davrlar o‘z navbatida yana qator bosqichlarga bo‘linadi.
Eng qadimgi ma’naviyat unsurlari – Islomgacha milliy ma’naviyatimiz taraqqiyotining birinchi bosqichi. Tosh asriga muvofiq keluvchi ibtidoiy jamoa davrida shakllangan ma’naviy qadriyatlar. Bu davrda hanuz yozuv ixtiro qilinmagani uchun yaxlit shakllangan alohida ma’naviyat tizimi haqida xulosa qilish qiyin.
Ilk shahar jamoasi ma’naviyati – Islomgacha milliy ma’naviyatimiz taraqqiyotining ikkinchi bosqichi. Asosan bronza asriga muvofiq keluvchi ilk shahar-davlatlar davrida shakllangan yaxlit ma’naviyat tizimi (masalan, shumerlar ma’naviyati yoki “Avesto” ma’naviyati). Bu davr odamlari Borliq haqiqatini asosan asotir tarzida tasavvur etganlar.
Asotir (mif) – ibtidoiy inson ongida Borliq haqiqatining xayoliy timsollar vositasida ifodalanishi. Hozirgi zamon odami asotirni afsona sifatida tushunadi, ammo qadimgi dunyo odamlari asotirning Borliq haqiqatini ifodalashiga shubha qilmaganlar. Masalan, Qadimgi yunonlar Zevs, Apollon, Afrodita kabi turli sanamlarni Olimp tog‘ida abadiy yashaydi deb tasavvur qilganlar va ular sharafiga ibodatxonalar qurib, qurbonliklar keltirganlar. Asotir va badiiy asarning umumiy tomoni Borliq haqiqatini timsollar vositasida anglash va anglatishga urinish bo‘lib, ularning o‘zaro farq qiluvchi tomoni - asotirni o‘z davrining odami haqiqat deb qabul qilgan, san’at asarini esa insonlar mutlaq haqiqat deb o‘ylamaydi, balki ibrat maktabi sifatida tushunadi.
Do'stlaringiz bilan baham: |