Tasdiqlayman” O’quv ishlari bo’yicha

Falsafiy tafakkur - murakkab tarkibli tafakkur turlaridan, mantiqiy va evristik tafakkur asosida Borliq haqiqatini modellashtirishga urinish.

Ilmiy tafakkur - murakkab tarkibli tafakkur turlaridan, mantiqiy va evristik tafakkurga hamda maxsus amaliy tajribalarga tayangan holda muayyan nazariy muammoni hal qilishga urinish.

Badiiy tafakkur – Ko‘proq timsoliy va evristik tafakkur asosiga qurilgan murakkab tarkibli tafakkur turlaridan bo‘lib, ijodkorning Borliq haqiqati haqidagi o‘z tasavvurlarini. hayotiy yoki xayoliy timsollar tizimi vositasida modellashtirishi. Badiiy timsol haqiqatni o‘zida to‘liq ifodalashga da’vo qilmaydi, faqat unga ishora qiladi.

Jahon madaniyati - turli o‘lka va mintaqalarning o‘ziga xos madaniyatlari majmuidan iborat bo‘lib, mavhum bir shakldagi umuminsoniy madaniyat hayotda asli mavjud emas. Insoniyat tarixiy taraqqiyoti jarayonida avval muayyan kichik jamoalar doirasida shakllangan madaniyat unsurlari bora-bora kengroq miqyos kasb etib, turli elat va millatlar, mintaqalar madaniyati darajasiga ko‘tarilib bordi va nihoyat YAngi davrga kelib yaxlit bir voqelik sifatida idrok etila boshladi.

Umuminsoniy (ma’naviy) qadriyatlar - ularni biror-bir alohida xalq yaratmaydi, aslida dastlab har bir millat ma’naviy qadriyatlari o‘ziga xos tizim shaklida namoyon bo‘ladi, keyinroq har bir xalq, har bir elat o‘z tarixiy tajribasi davomida asta-sekin shakllantirib borgan bunday tizimlar turli elat va millatlarning o‘zaro munosabatlari tufayli bir-birini tushunish, barcha xalqlar uchun umumiy bo‘lgan jihatlarni tadrijiy anglab borish jarayonida asta-sekin umuminsoniy mohiyat kasb etib boradi. Zotan, milliy ma’naviyatimiz zamirini bizni o‘zgalardan ajratib turuvchi mohiyatlar emas, balki birlashtiruvchi omillar tashkil etadi.

Islom dini – Muhammad(sav) ga vahiy orqali nozil bo‘lgan Allohning oxirgi kitobi Qur’oni karimda va Payg‘ambarimizdan etib kelgan sahih hadislarda o‘z ifodasini topgan e’tiqod tizimi.

Musulmonchilik – Allohning borligi va birligi hamda Muhammad(sav) uning oxirgi haq payg‘ambari ekanligiga imon keltirgan barcha insonlarning islom dini haqidagi tasavvurlari. Islom madaniyati tarixida islom aqidalarini tushunishdagi turlicha qarashlarning mavjud ekanligi islom va musulmonchilik o‘zaro bog‘liq bo‘lgan turli voqeliklarni anglatishini ko‘rsatadi.