Analitik kimyo

Eritmani tayyorlashda 0,4-0,5 g massali k.t. rux metali granulasi oldin texnik tarozida o‘lchab olinadi va so‘ngra uning aniq massasi analitik tarozida tortib aniqlanadi. Tortim 250 ml li o‘lchov kolbasiga solinadi, ustiga 5-6 ml konsentrlangan HCl va 5 ml suv quyiladi. Ruxning hammasi erib bo‘lgach, kolbaning belgisigacha suv solinadi va eritma astoydil aralashtiriladi. Rux eritmasining normalligi quyidagi formula yordamida hisoblanadi:

bu yerda, m_Zn - ruxning massasi.

Ruxning birlamchi standart eritmasi yordamida EDTA eritmasini standartlash. Titrlash kolbasiga ruxning standart eritmasidan alikvot qism olinadi, ustiga 20 ml pH= 11 bo‘lgan ammiakli bufer aralashma va 1 % li erioxrom qora T indikatorining bir necha kristallari (odatda ~1 % li erioxrom qorasi osh tuzining mayda kristallari bilan aralashtirib tayyorlanadi) qo‘shiladi. So‘ngra hosil bo‘lgan eritma standartlanadigan EDTA eritmasi bilan aralashmaning qizil rangi ko‘kka kirgunga qadar titrlanadi. Oxirgi nuqtaga yaqin qolganda titrant juda sekinlik bilan tomchilatib qo‘shilishi zarur. Titrlash kamida uch marta takrorlanadi va o‘rtacha natija olinadi.