3 бўлим: Шўр ерларда доривор ўсимликларнинг интродукцияси ва биологик хусусиятлари

Доривор лимон - ўти - Мелисса лекарственная - Мята лимонная
(Melissa officinalis L.).
Доривор лимон ўти - Lamiaceae оиласига мансуб кўп йиллик ўт. Ўсимлик табиатда Шарқий Европанинг жанубий районлари, Кавказ ва Ўрта Осиёнинг тоғ олди адирликлари, ариқлар бўйида учрайди. Доривор хом-ашё сифатида, ўсимликнинг ер усти қисми ишлатилиб, унинг таркибида лимон ҳидини берувчи эфир - мойлари мавжуд. Ўсимликдан олинадиган эфир – мойлари парфюмерияда ва халқ табобатида ўсимлик барглари паст даражада қувватни ошириш воситаси сифатида фойдаланилади [29] (илова – 294-бет).
Доривор лимон ўти ўртача шўрланган тупроқларда уруғдан экилиб, унувчанлик 6,6 % ва сақланиш 60,8 % ни ташкил этади. Вегетация давомида ўсимликлар асосий поясининг узунлиги -3,7±0,93 см ва ундаги барглар сони 6,2±1,65 ни ташкил этади. 2- вегетация йилида бу кўрсаткичлар 17,7±3,26 см га ва 9,6±2,66 та га етади. Вегетация давомида асосий поядан ўртача 4,8±1,07 та барглар тўкилиб, 7,4±1,87 см ёғочланади. Шўрланган тупроқларда ўсимликларнинг генератив даври 2- вегетация йилидан бошланади ва вегетациянинг охирларида 1 туп ўсимликда: 4,2±0,66 та тўп ғунчалар; 7,4±1,88 та тўп гуллар; 3,6±0,93 та шаклланган тўп мевалар ва 4,6±1,63 та пишган тўп мевалар кузатилган. Кучли шўрланган тупроқларда эса, ўсимликлар 2 хил усулда, уруғ ва кўчатдан экилди. Уруғдан экилганда унувчанлик кузатилмаган бўлсада, кўчатларнинг кўкарувчанлиги (100 % гача) ва сақланиш (80,0 %) юқори кўрсаткични ташкил этади. Кўчатдан экилган ўсимликларда асосий поя баландлиги -28,0±2,42 см га, барглар 15,4±1,29 та га етади ва 12,8±1,70 см ёғочлананади. 1- вегетация йилидаёқ 1 ва 2- тартибли новдалар ҳосил бўлиб, уларда генератив органлар шаклланади. Яъни, асосий пояларда 19,2±2,29 та 1- тартибли новдалар ҳосил бўлиб, уларнинг узунлиги -12,3±1,46 см га етади. Ўз навбатида, 1- тартибли новдаларда 34,8±1,85 та 2- тартибли новдалар ҳосил бўлади ва ўртача 3,8±0,81 см га ўсади. Вегетация йилининг охирларида бир туп ўсимликда ўртача: 6,2±1,39 та тўп ғунчалар; 5,6±0,87 та тўп гуллар; 8,0±0,70 та шаклланган тўп мевалар ва 5,8±0,73 та пишган тўп меваларнинг мавжудлиги қайд этилган (3.8, 3.9 - жадваллар).