Халқ таълими ходимлари асосий лавозимларининг малака тавсифлари

8-боб. Ўқувчиларни касб-ҳунарга йўналтириш ва
психологик-педагогик республика ташхис маркази
ходимларининг малака тавсифлари


53-§. Ўқувчиларни касб-ҳунарга йўналтириш ва
психологик-педагогик республика ташхис
маркази директори лавозимининг
малака тавсифлари

Тартиб рақами	528
Машғулотларнинг миллий стандарт классификатори бўйича коди	1210
Ходимлар тоифаси	Бошқарув

158. Лавозим вазифалари:

а) Ўқувчиларни касб-ҳунарга йўналтириш ва психологик-педагогик республика ташхис маркази (бундан буён матнда ташхис маркази деб юритилади)нинг умумий фаолиятига раҳбарлик қилиш;
б) ташхис маркази иш фаолиятини самарали ташкил этиш, йиллик ва истиқбол иш режаларини шакллантириш, уларни ўз вақтида сифатли бажарилишини назорат қилиш, ижро интизомига риоя қилиш ҳамда илмий-методик кенгаши фаолиятига раҳбарлик қилиш;
в) ташхис маркази томонидан илмий-назарий ҳамда илмий-амалий конференциялар, семинарлар ташкил этиш, илмий мақолалар ва тўпламлар яратиш ишларига раҳбарлик қилиш;
г) ташхис марказига ажратилган бюджет маблағлари ва бошқа бюджетдан ташқари тушумлардан тўғри фойдаланишни таъминлаш ҳамда унинг мулкига эҳтиёткорона муносабатда бўлиш;
д) ташхис марказининг ходимларга бўлган эҳтиёжини аниқлаш, кадрларни танлаш ва жой-жойига қўйиш, юқори малакали мутахассислар билан тўлдириш, уларнинг касбий маҳоратларини ривожлантириш бўйича чора-тадбирларни амалга ошириш ҳамда кадрлар захирасини шакллантириш;
е) ташхис маркази ходимларини қайта тайёрлаш ва уларнинг малакасини ошириш, ходимлар аттестацияси ишларини ташкил қилиш ҳамда улар томонидан меҳнат интизомига риоя қилинишини назорат қилиш;
ж) ташхис маркази ходимларининг вазифалари, лавозим мажбуриятларини белгилаш, улар орасидаги энг фаолларини рағбатлантириш, ўз ваколати доирасида интизомий жазо чораларини қўллаш масалаларини кўриб чиқиш;
з) ташхис маркази бўлим бошлиқлари иш тақсимотини, ходимларнинг йиллик ҳамда ойлик иш режаларини тасдиқлаш ва улар томонидан ўзига юклатилган вазифаларнинг бажарилишини назорат қилиш;
и) корхона, муассаса ва ташкилотлар билан хўжалик шарномалари тузишда ташхис маркази номидан фаолият юритиш, унинг манфаатларини ҳимоя қилиш, ишончномалар бериш, турли йўналишдаги давлат ва нодавлат жамғармалар билан ўзаро ҳамкорликда иш юритиш;
к) ташхис марказининг моддий-техника базасини мустаҳкамлашга оид чора-тадбирларни амалга ошириш, ўқув жиҳозлари, асбоб-ускуналар ва бошқа таълим воситаларининг сақланишини ва улардан самарали фойдаланишни таъминлаш;
л) ўқувчиларни касб-ҳунарга йўналтириш ва психологик-педагогик диагностика масалалари бўйича жисмоний ва юридик шахсларнинг мурожаатларини кўриб чиқиш, таълим муассасалари ҳамда ўқув-ишлаб чиқариш мажмуаларида ўқувчи-ёшларни касб-ҳунарга йўналтириш, илмий-методик ва ахборот таъминотини амалга ошириш;
м) санитария-гигиена талаблари, меҳнатни муҳофаза қилиш, техника ва ёнғин хавфсизлиги қоидалари талабларига риоя қилиш.
159. Билиши лозим:
а) давлатимизнинг халқ таълимига оид ва болалар ҳуқуқларини тартибга солувчи норматив-ҳуқуқий ҳужжатларини;
б) мутахассислиги бўйича янгиликларни, психология-педагогика фани ютуқларини ва уни ҳаётга татбиқ этиш йўлларини;
в) методик ишларни ташкил этиш ва самарадорлигини ошириш усулларини;
г) кадрларни танлаш ва жой-жойига қўйиш усулларини, уларнинг малакасини ошириш ва қайта тайёрлаш тартибини;
д) давлат таълим стандартлари, ўқув режа, ўқув дастури ва бошқа ўқув-методик ҳужжатларнинг мазмуни ҳамда ўқув жараёнига татбиқ этиш йўлларини;
е) санитария-гигиена талаблари, меҳнатни муҳофаза қилиш, техника ва ёнғин хавфсизлиги қоидаларини.
160. Малака талаблари:
а) олий педагогик маълумот;
б) хорижий тиллардан бирининг бошланғич босқичини ва ахборот-коммуникация технологияларидан фойдаланишни билиши;
в) камида беш йиллик иш стажи.