Глоссарий

8.5. Юклаш - тушириш машиналари

Қурилиш ишлаб чиқаришида юклаш - тушириш ишларини бажариш учун юклагич ва туширгич машиналаридан фойдаланилади.

Юкланадиган материалларнинг турига қараб, донали юклар учун (кўтариб олувчи ёки айрили) ва сочилувчан юклар учун (ботириб олувчи) мўлжалланган юклагичлар қўлланади. Ботириб олувчи юклагичлар бир чўмичли ва кўп чўмичли узлуксиз ҳаракатланувчи турларга бўлинади. Бир чўмичли юклагичлар универсал ҳисобланиб, улар турли хил шароитларда қўлланилади. Кўп чўмичлилар эса катта омборларда, йўл қурилишида ва ишлаш жараёни узлуксиз бўлган конларда кенг қўлланади.
Юклаш-тушириш машиналари таснифланади:

1. 
   мақсади бўйича – сочилувчан материаллар ва донали юклар учун;
   
2. 
   иш режими бўйича – даврий ва узлуксиз ҳаракатланувчи;
   
3. 
   ишчи органи тури бўйича – бир чўмичли, кўп чўмичли ва айрили;
   
4. 
   юриш қисми бўйича – пневмоғилдиракли ва гусеницали.
   

8.5.1.Бир чўмичли юклагичлар универсал бўлиб турли мақсадларда ишлатилиши мумкин.
Бир чўмичли юклагичлар, асосан, сочилувчан, майда бўлакли материаллар ва донали юкларни юклаш-тушириш, ташиш ва тахлаш ҳамда зичлашиб қолмаган I ва II категорияли грунтларни, III категорияли табиий грунтларни ковлаб, машиналарга юклаш учун хизмат қилади. Ҳозирги пайтда қурилишда энг кўп қўлланадиган юклагичлар хажмли гидравлик юритмага эга бўлган, ғилдиракли, фронтал иш жиҳозига эга бўлган қурилиш юклагичларидир (8.10-расм). Шунингдек, ярим айланувчи юклагичлар қўлланилади (8.11-расм).
Бир чўмичли юклагичларнинг асосий параметри –номиналь юк кўтарувчанлиги. Ушбу параметр бўйича улар кам (0,5 т), енгил (0,6...2,0 т), ўрта (2,1...4,0 т) оғир (4,1...10,0 т) ва катта юклиларга (10 т дан юқори) бўлинади.


8.10-расм. Фронтал бир чўмичли юклагичлар.

8.11-расм. Ярим айланувчи юклагич.

Бир чўмичли юклагичнинг алмашлаб ишлатиладиган иш жиҳозлари ва осма ускуналари 8.12-расмда кўрсатилган.