Глобаллашув шароитида мафкуравий иммунитетни шакллантириш вазифалари. Режа

Учинчидан. миллий маънавий иммуни­тетни шакллантириш ва мустаҳкамлашнинг муҳим омиллари қаторида демократик кадриятлар хам муҳим ўрин тутади. Де­мократия нафақат жамият аъзоларининг ҳокимият бошқарувида кенг миқёсдаги иштироки, айни пайтда инсон ҳуқуқ ва эркинликларининг таъминланишини ҳам тақозо этади. Чунки эркин инсонгина иқтисодий ва ижтимоий-сиёсий эҳтиёжларини қондира олиши мумкин. Шунинг учун ҳам инсон хукуқ ва эркинликлари миллатнинг иқтисодий, ижтимоий-сиёсий тараққиётида муҳим аҳамиятга эга.
Аслида демократик қадриятлар тизимининг асосини ҳам ҳар бир фуқаронинг эр­кин фаолияти учун яратилган имкониятлар ташкил қилади. Чунки эркинлик сиёсий ҳуқукларнинг тўлақонли мавжудлиги ва улардан амалда фойдалана билиш билангина чекланиб қолмайди. Балки инсоннинг ўз хоҳишига кўра яшашини ҳам тақозо этади. Бу ҳар бир инсон учун нафақат катта имконият, айни вақтда масъулият ҳамдир. Чунки жамиятда барқарорлик етарли, давлат турли хавф-хатарлардан холи бўлса, ҳар бир инсон эркинлигининг дахлсизлиги таъминланади.
Демократик қадриятлар ривожининг секинлашуви ёки орқага кетиши инсон эркинлигига ҳам салбий таъсир кўрсатади. Бунинг натижасида инсон жамият ҳаётидаги жараёнларга бепарво қарайдиган, улар учун масъулиятни давлат зиммасига юклайдиган бўлиб қолади. Бундай вазиятда ўз-ўзидан маънавий иммунитет заифлашади, айниқса, ҳаётий тажрибага эга бўлмаган ёшларда вазиятни тўғри баҳолай олмаслик ҳолатлари кучайиб боради. Бу эса охир-оқибатда жамият ва фуқаро ўртасидаги муносабатларда мувозанат йўқолиб, фуқаро масъулиятсизлигининг кучайиши, маънавий иммунитетнинг барбод бўлишига олиб келади.
Босиқлик, вазминлик, жамоа фикри устуворлигига эришган миллат миллий маъ­навий иммунитетида консерватизм кучли бўлади. Аммо бундай иммунитет ҳам ҳаёт талаби билан замонга мослашиб боради. Табиийки, бу миллат истиқболига қаратилган хавфнинг олдини олишга ёрдам беради. Кўриниб турибдики, миллий-маънавий иммунитетни шакллантиришда умум-эътироф этилган демократик қадриятларнинг инсон эркинлиги билан боғлиқ устувор йўналишларини ривожлантириш муҳим амалий аҳамиятга эга.