Глобаллашув шароитида мафкуравий иммунитетни шакллантириш вазифалари. Режа

Биринчидан, миллий интеллектуал салоҳиятни ривожлантириш ва ундан сама­рали фойдаланиш. Бунинг учун таълим ва миллий тарбияни ривожлантириш, урф-одат, анъана ва қадриятларни умумбашарий қадриятларга уйғун ҳолда ёшлар дунёқарашининг ажралмас қисмига айлантириш. Токи ёшлар умумбашарий қадриятлар билан бирга ўз миллати кадриятларининг бойлиги ва гўзаллигини ҳам чуқур ҳис этсин. Уларга миллий маънавиятнинг асосий манбаси сифатида қарайдиган бўлсин. Аммобу осон эмас. Чунки бугун жаҳонда инсон қалби ва онгини эгаллаш миллат маънавиятини ёт ғоялар билан алмаштириш, охир-оқибатда миллионлаб одамлар устидан маънавий хукмронлик ўрнатиш учун жуда катта маблағ, куч-кудрат ишга солинмокда.
Баъзан бундай вазиятда ҳаётий тажрибага эга бўлмаган, моддий жихатдан қийналаётган айрим ёшлар нажотни ташқаридан излашга ҳаракат қилади. Бундан ташқари, ёшларга хос қизикувчанлик, оқибатини ўйламасдан иш тутиш ҳам мил­лий маънавий иммунитетнинг заифлашувига сабаб бўлади.
Юксак интеллектуал салоҳият миллий маънавий иммунитетни шакллантириш ва мустаҳкамлашнинг асосий омили ҳисобланади. Унинг юксалишига эришиш оркали ёшларнинг маънавий эҳтиёжини мил­лий маънавий бойликларимиз билан қондиришимиз, уларни турли ғоявий хуружлардан ҳимоя қилишимиз мумкин. Бу вазифани амалга оширишда миллатнинг ақл-зиё салоҳияти ўзагини ташкил қиладиган зиёлилардан самарали фойдала­ниш, уларни фаоллаштириш, бунинг учун зарур чора-тадбирларни кўриш лозим бўлади.
Миллий интеллектуал салоҳияти юксак бўлган миллатгина мамлакатни тараққиётга олиб борувчи миллий ғояларни ишлаб чикиши ва уларни амалиётга татбиқ қилиши мумкин. Жаҳон тажрибаси шуни кўрсаталики, интеллектуал салохияти ривожланмаган миллат жаҳолатга маҳкум бўлиб яшайди. Демак, миллий интеллек­туал салоҳиятни ошириш, у ҳакда доимий ғамхўрлик қилиш миллий маънавий имму­нитетни изчиллик билан мустахкамлашнинг асосий шарти ҳисобланади.
Шунинг учун ҳам турли тахдидлар кучайиб бораётган ҳозирги даврда мамлакатимизда миллий интеллектуал салоҳиятни ошириш масаласига катта эътибор берилмокда. Юртимизда барпо этилаётган янги-янги мактаблар, лисей ва коллежлар, замонавий олий ўкув юртлари, маданият муассасалари, амалга оширилаётган катор давлат дастурлари — барчаси ана шу мақсадга хизмат қилади.