Гижжаларга қарши (антигeльминт) воситалар

Ичак трематодозларини (метагонимоз) даволашда празиквантел қўлланилади. Бундан ташқари тўрт хлор этилен (перхлорэтилен) ни қўллашади. Тўрт хлор этилен анкилостомидозда (эгри бошли гижжада) ҳам самарадордир. Ичакдан кам сўрилади. Дегельминтазацияга тайёрлаш ва уни ўтказиш даврида ва ундан кейинги 1-2 кун ичида углеводларга бой бўлган, ёғсиз озиқ-овқатлар берилади, алкоголли ичимликларни ичиш қатъий ман этилади. Препаратни ичилганидан 15-30 дақиқа сўнгра тузли сургилар берилади.
ИЧАКДАН ТАШҚАРИДАГИ ГEЛЬМИНТОЗЛАРНИ ДАВОЛАШДА ҚЎЛЛАНИЛАДИГАН ДОРИ ВОСИТАЛАР
Ичакдан ташқаридаги нематодозлардан (33.2-жадвалга қаранг) энг кўп учрайдигани турли хил филяриатозлар ҳисобланади (жумладан онхоцеркоз, кўзларни жароҳатлаб кўпинча кўз ожизлигига олиб келади).
Микрофилярийларга ҳалокатли таъсир кўрсатувчи препаратларга дитразин цитрат (диетилкарбамазин цитрат, лоскуран) мансуб. У меъда-ичак трактидан яхши сўрилади. Қонда максимал концентрацияси 3 соатдан кейин ҳосил бўлади. Метаболитлар ва қисман ўзгармаган ҳолда буйрак орқали 2 кун мобайнида чиқарилади.
Препарат ҳар-хил аъзоларда жойлашган филяриатозларда ичиш учун буюрилади. Нохуш таъсирлари (бош оғриғи, ҳолсизлик, кўнгил айниши, қайт қилиш) кўп ривожланади, аммо тез ўтиб кетади. Эҳтимол уларнинг бир қисми филярийларнинг парчаланиши ва парчаланиш махсулотларининг таъсири билан боғлиқдир.
Ушбу патологияда ивермектин препарати ҳам қўлланади. У ярим синтетик макроциклик лактон ҳалқали бирикма бўлиб, Streptomyces avermitilis актиномицетлари ишлаб чиқаради. Глутамат бошқарадиган хлор каналларини очиб юмалоқ гижжаларни фалажлайди. Филярий ва стронгилоидларнинг ҳаёт фаолиятини тўхтатади. Онкоцеркозларни даволашда, айниқса кўз жароҳатланланганда, энг самарадор. Нохуш таъсирлари (иситмалаш, уйқучанлик, ҳолсизлик, бош айланиш, бош оғриғи, гипотензия, бронхоспазм ва шу кабилар) препаратнинг бевосита салбий таъсири ҳамда микрофилярийларнинг оммавий ҳалок бўлиши билан боғлиқ.
Мушаклар ва ичакни жароҳатловчи трихинеллёз қўзғатувчисига қарши бензимидозол ҳосилалари (мебендазол) камроқ самаралидир.