Genetikadan masala ishlash

237-masala. Ikkita populyasiya quyidagi genotipik chastotalarga ega:

birinchisi - 0,24 AA, 0,32 Aa va 0,44 aa

ikkinchisi - 0,33 AA, 0,14 Aa va 0,53 aa.

Panmiksiya holatida keyingi avloddagi genotiplarning nisbati qanday bo‘ladi?

238-masala. Quyidagi chastotalarga ega bo‘lgan individlar guruhi mavjud: 1) 60% AA va 40% aa;

2) 50% AA, 30% Aa va 20% aa;

3) 30% AA, 40% Aa va 30% aa.

Panmiksiya holatida AA, Aa va aa genotiplarning ikkinchi avloddagi chastotasini aniqlang.

239-masala. Ayrim aholi populyasiyalarida albinoslar (aa) 0,00005 chastota bilan uchraydi. A va a allelarining hamda AA va Aa genotiplarning populyasiyadagi chastotasini aniqlang.
240-masala. Evropa populyasiyalarida albinizm 7x10^-10 miqdorda uchraydi. Populyasiyada albinizmni tashuvchi 1 ta odam barcha odamlar sonining qanchasiga to‘g‘ri kelishini aniqlang.
241-masala. Retsessiv gen orqali belgilanadigan fruktozuriya aholi o‘rtasida 7x10^-5 chastotada uchraydi. Dominant va retsessiv allellarning hamda har xil genotiplarning populyasiyadagi chastotalarini aniqlang.
242-masala. Populyasiyada kasallik 400 kishidan 1 taga to‘g‘ri keladi. Kasallik tashuvchining hissasini va populyasiyadagi genotiplarning chastotalarini aniqlang.
243-masala. SHaharda aholining qon gruppalari aniqlab chiqilganda 4200 kishidan 1218 tasi M, 882 tasi N va 2100 tasi MN qon gruppasiga ega ekanligi ma’lum bo‘lgan. Populyasiyada allellarning chastotasini aniqlang.
244-masala. Odamlarning uchta populyasiyasida qon gruppasi M-N tizimi bo‘yicha o‘rganilganda, quyidagi natijalar olingan:

1. AQSH ning oq tanli aholisining populyasiyasida M qon gruppasiga ega aholi 29,16% ni, N qon gruppasiga ega aholi 21,26% ni va MN qon gruppali aholi 49,58% ni tashkil qilgan;

2. SHarqiy Grenlandiya eskimoslari populyasiyasida M qon gruppasiga ega kishilar 83,49% ni, N gruppalilar 0,88% ni va MN gruppalilar 15,64% ni tashkil qilgan;

3. Avstraliyaning tub aholisi populyasiyasida M gruppalilar 3,0% ni, N gruppalilar 67,4% ni va MN gruppalilar 29,6% ni tashkil qilgan. Har uchchala populyasiyada M va N allellarning uchrash chastotasini aniqlang.

245-masala. 280000 aholisi bor tumanda retsessiv holda nasldan-naslga o‘tadigan kasallik 7 ta bolada aniqlangan. Bu kasallikni belgilovchi retsessiv allelning va uni tashuvchi geterozigotali genotipning chastotasini aniqlang.
246-masala. Evropa shaharlaridan birida qon gruppasining M-N tizimi bo‘yicha aholi o‘rtasida tekshiruv o‘tkazilganda, 11163 kishi MM genotipiga, 15267 kishi MN genotipiga va 5134 kishi NN genotipiga ega ekanligi aniqlangan. O‘rganilgan populyasiyada M va N allellarning chastotasini aniqlang.
247-masala. Er shari aholisi o‘rtasida qon gruppasi ABO tizimi bo‘yicha to‘rt xilda va turli tartibda uchraydi. Ma’lumotlarga ko‘ra, Amerika hindularining ko‘pchilik qabilalarida qon gruppalari faqat I yoki II bo‘ladi. Ayrim qabilalarda esa qon gruppalari I yoki III bo‘lar ekan.

Agar populyasiyada kishilar I (OO) va II (AA, AO) qon gruppalariga ega bo‘lib, aholining 98% i birinchi qon gruppasiga ega bo‘lsa, bu populyasiyaning genetik tarkibini aniqlang.

Agar populyasiyada kishilar I (OO) va III (BB, BO) qon gruppasiga ega bo‘lsa va aholining 83% ida I qon gruppasi kuzatilsa, bu populyasiyaning genetik tarkibi qanday bo‘ladi?