Gazlerdi tazalaw

Dánesheli qatlamlı filtrler. Bunday filtrlerde dáwirlik qozǵalmas yamasa úzliksiz hárekettegi filtrlewshi qatlam sıpatında maydalanǵan koks, kvarc, qum, sheben hám basqa materiallar qollanılıwı múmkin.
Filtrlewshi qatlam reshyotka yamasa tor arasındaǵı sekciyada, gorizontal yamasa vertikal jaǵdayda ornatılıwı múmkin.
3.16-súwrette úzliksiz isleytuǵın qumlı filtr konstrukciyası keltirilgen. Bul túrdegi filtrler gazlerdi jumsaq tazalaw ushın qollanıladı. Máselen qısılǵan gazlerdi maylardan, qara kúyeden hám sintez gazlerin shańnan tazalaw ushın qollanılıwı múmkin.


3.16. Gazlerdi suyıqlıq penen juwıp tazalaw
Shańlı gazllardi tazalaw ushın olardı suw yamasa basqa suyıqlıqlar járdeminde juwıp, qattı bólekshelerden tazalanadı. Bul usıl gazlerdi suwıtıw hám ıǵallaw ruxsat etilgen hámde qattı bóleksheler zárúr, bolmaǵan hallarda qollanıladı. Bizge belgili gazler suwıtılǵanda suw puwları kondensiyaciyalanıp, bóleksheler ıǵallanadı hám olardıń tıǵızlıǵı artadı. Nátiyjede qattı bóleksheler gazden ańsat ajıraladı. Bunda, bóleksheler kondensaciyalanıw orayları wazıypasın orınlaydı. Eger, bóleksheler suyıqlıq penen ızǵarlanbasa, onda bul túrdegi qurılmalarda gazlerdi tazalaw nátiyjesiz boladı. Bóleksheler kondensaciyalanıw orayları wazıypasın orınlaydı. Bunday jaǵdaylarda gazlerdi tazalaw dárejesin joqarılatıw ushın suyıqlıq quramına spirt – beti aktiv zatlar qosıladı, yaǵnıy suyıqlıqtıń qollanıw qábileti joqarılaydı.
Suyıqlıq penen juwıp tazalawshı qurılmalarda, olardıń kostrukciyasına qarap, gazlerdi tazalaw dárejesi 60 den 85% ge shekem boladı. Bul túrdegi qurılmalardıń tiykarǵı kemshiligi sonda, tazalaw processi ótkeriliwi nátiyjesinde aqaba suwlar payda bolıwı bolıp esaplanadı, aqaba suwlar da óz náwbetinde tazalanıwı kerek.
Skrubberler – ishi bos yamasa nasadkalı, kese kesim júzesine qarap bolsa, cilindr tárizli yamasa tuwrı tórtmúyesh formadaǵı kalonnalar kórinisinde boladı.
Ishi bos skrubberlerge shańlı gaz qurılmalardıń tómengi bóliminen 0,8...1,0 m/s tezlikte kirgiziledi. Gaz óz baǵdarın ózgertip, joqarıǵa qarap háreket etedi. Skrubberdiń joqarǵı bólimindegi búrkegishten suw yamasa basqa suyıqlıq shashılıp, awırlıq kúshi tásirinde mayda tamshılar tómenge qaray baǵdarlanadı. Nátiyjede gaz hám suw tamshıları qarama – qarsı jollı háreketinde bir – birine kóp mártebe urıladı. Bul óz ara tásirlesiw sebepli gaz quramındaǵı qattı bóleksheler suyıqlıq penen juwıladı, awırlasadı hám aqaba suw payda etip, tómenge túsedi. Tazalanǵan gaz skrubberdiń joqarǵı bólimindegi shtutcerden shıǵıp ketedi. Aqaba suw qurılmanıń túbindegi shtutcer arqalı tazalawǵa shıǵarılıp jiberiledi.
Ishi bos skrubberde gazlerdiń tazalanıw dárejesi 60...75% tı quraydı. Nasadkalı skrubberlerde qabıqtıń ishine nasadkalar belgili bir tártıpte yamasa tártıpsız ornatıladı (3.34a-súwret).
Tazalaw processiniń intensivligin hám tezligin joqarılatıw ushın skrubberlerge álbette nasadkalar jaylastırıladı. Nasadkalardı qollanıw nátiyjesinde gaz hám suyıq fazalar ortasında urınıwlar artadı, yaǵnıy soqlıǵısıw júzesi kóbeyedi. Ádette skrubberlerge saqıyna tárizli yamasa xordalı nasadkalar ornatıladı. Ayırım jaǵdaylarda bolsa, koks yamasa kvarc bóleklerinen payda etilgen qatlam nasadka sıpatında qollanılıwı múmkin. Nasadkalı skrubberlerde gazlerdiń tazalanıw dárejesi 75....85%.