Fuqarolik xuquqi bilan tartibga solinadigan munosabatlar O‘zbekiston Respublikasi fuqarolik kodeksining 2-moddasida belgilab qo‘yilgan

3. Mulkning daxlsizligi prinsipi fuqarolik huquqining asosiy prinsiplaridan biri hisoblanib, O‘zbekiston Respublikasi Konstitutsiyasining 36 va 53-moddalarida o‘z aksini topgan. Xususiy huquqda ham, ommaviy huquqda ham ushbu prinsip shaxsning o‘ziga qarashli mol-mulkka o‘z hohishi bilan va o‘z manfaatlarini ko‘zlab egalik qilish, undan foydalanish va uni tasarruf etish, shuningdek, mulk huquqini kim tomondan bo‘lmasin, har qanday buzishni bartaraf etishni talab qilish imkoniyatlarining ta’minlanganligini anglatadi. «Har bir shaxs mulkdor bo‘lishga haqliligi» O‘zbekiston Respublikasi (Konstitutsiyasining 36-moddasi), «Xususiy mulk boshqa mulk shakllari kabi daxlsiz va davlat himoyasidadir. Mulkdor faqat qonunda nazarda tutilgan hollarda va tartibdagina mulkidan mahrum etilishi mumkin» (O‘zbekiston Respublikasi Konstitutsiyasining 53-moddasi) degan qoidalar buni yaqqol isbotlab turibdi. Bundan tashqari mulkning dahlsizligi haqidagi konstitutsion qoida begona shaxsning mulkini asossiz o‘zlashtirishga, mulk huquqini qonunga zid ravishda bekor qilishga va mol-mulkni o‘zboshimchalik bilan egallab olishga chek qo‘yadi. Ta’kidlash lozimki, ushbu prinsip, shuningdek, fuqarolik qonun hujjatlarida, xususan, fuqarolik kodeksining 1, 164, 166, 199, 202, 203 va boshqa qator moddalarida to‘liq o‘z ifodasini topgan. Masalan, FK 166-moddasida mulkning daxlsizligi, uning qonun bilan qo‘riqlanishi, mulkdorga qarshi turgan barcha sub’ektlarning mulk huquqini buzishdan o‘zlarini saqlashlari to‘g‘risidagi normalar belgilangan.