Fuqarolik xuquqi bilan tartibga solinadigan munosabatlar O‘zbekiston Respublikasi fuqarolik kodeksining 2-moddasida belgilab qo‘yilgan

5. Fuqarolik huquqining tamoyillari
Huquqiy prinsiplar deganda, qonuniy mustahkamlanganligi tufayli umummajburiy tusga ega bo‘lgan, huquqning mazmun-mohiyatini ifoda etuvchi bosh va asosiy qoidalar (negizlar) tushuniladi. Bunday qoidalar, nafaqat, bir butun yagona huquqiy tizimga yoki huquq sohasiga, shuningdek, soha osti, institutlar va hatto subinstitutlar (yordamchi institutlar)ga ham xosdir.Huquqiy prinsiplar, shuningdek, sohaviy prinsiplar ahamiyatini ikki jihatdan baholash mumkin. Birinchidan, ular huquqiy tartibga solish mazmunining mohiyatini, ijtimoiy yo‘nalishini hamda sohaga taalluqli xususiyatlarini aks ettirsa, ikkinchi tomondan, qonunchilikdagi nuqsonlar aniqlanganda va huquqiy normalarni o‘xshashlik bo‘yicha qo‘llaganda, albatta, hisobga olinishini nazarda tutadi.

Fuqarolik–huquqiy tartibga solishning prinsiplari qatoriga quyidagilar kiradi:

Xususiy ishlarga boshqalarning o‘zboshimchalik bilan aralashuviga yo‘l qo‘yilmasligi. Bu prinsip fuqarolik huquqining xususiy huquq sifatida mavqeini tavsiflab, birinchi navbatda, ommaviy hokimiyat va uning organlarini nazarda tutadi. Bundan ko‘zlangan maqsad–hokimiyat organlari va umuman biron-bir kishining, fuqarolarning xususiy ishlariga, shuningdek, ularning mulkiy munosabatlar ishtirokchilari sifatida amalga oshiradigan xo‘jalik faoliyatiga, faqat qonunda nazarda tutilgan hollardagina aralashishiga yo‘l qo‘yilishini ta’minlashdan iborat.SHaxsiy–nomulkiy munosabatlar doirasida ushbu prinsip fuqarolar shaxsiy ishi va hayotining daxlsizligi to‘g‘risidagi qoidalarda o‘z ifodasini topgan (O‘zbekiston Respublikasi. Konstitutsiyasining 25-27 moddalari).Mazkur prinsip talablari Fuqarolik kodeksining 12-moddasi («Davlat organining yoki fuqarolarning o‘zini-o‘zi boshqarish organlari hujjatini haqiqiy emas deb topish»), 15-moddasi («Davlat organlari va fuqarolarning o‘zini-o‘zi boshqarish organlari tomonidan etkazilgan zararni to‘lash»), 1021 va boshqa moddalari orqali amalga oshiriladi.