Физикавий ва физик – кимёвий усулларни сифат таҳлилда қўлланиши Кириш Сифат таҳлилда, жумладан фармацевтик таҳлилда, илгариги бобларда баён этилган аналитик реакциялардан ташқари, «Ускунавий усуллар»

Aim.uz

Физикавий ва физик – кимёвий усулларни сифат таҳлилда қўлланиши
Кириш
Сифат таҳлилда, жумладан фармацевтик таҳлилда, илгариги бобларда баён этилган аналитик реакциялардан ташқари, «Ускунавий усуллар» деб номланувчи турли физик – кимёвий ва физикавий усуллар қўлланади. Бундай усулларни энг кўп тарқалган уч тури – оптик, хроматографик ва электрокимёвий усуллар бўлиб, бошқа турлари камроқ қўлланади.
Физик – кимёвий ва физикавий усулларнинг назарий асослари ва амалда қўлланиши, аналитик кимё курсининг бу масалаларга бағишланган махсус бўлимида, миқдорий таҳлилга боғлаб баён этилган. Бу бобда сифат таҳлилда қўлланиладиган баъзи ускунавий усулларнинг имкониятлари ҳақида тасаввур берувчи, қисқа таснифлар баён этилади. Мустасно тарзда, фармакопея сифат таҳлилида кенг қўлланиши сабабли, ИҚ – спектроскопик усули батафсил баён этилди.
Таҳлилнинг оптик усуллари
таҳлилнинг оптик усуллари, электромагнит нурлар таъсир этилган модданинг оптик: нурланиш, нур ютиш, нурни тарқатиш, қайтариш, синдириш, дифракция, интерференция ёки қутблантириш хоссаларини ўлчашга асосланган.
Электромагнит нурларни моддага таъсир этиш табиатига кўра таҳлилнинг оптик турлари: эмиссион спектроскопия, атом – абсорбцион, молекуляр абсорбцион спектроскопия (фотометрия, фотоэлектроколориметрия), люминесцент, нефелометрик, турбодиметрик, рефрактометрик, интерферометрик, поляриметрик таҳлил усулларига бўлинади. Бундан ташқари, нурни комбинацион тарқатилишига (раман самараси) асосланган спектрал таҳлил ва электромагнит майдонни моддага таъсир этувчи ядро магнит резонанс (ЯМР), электрон – парамагнит резонанс (ЭПР), ядровий гамма – резонанс спектроскопия (Мессбауэр самараси) ва хоқазо турлари мавжуд.
Бу усулларнинг барчаси ҳам сифат таҳлилда бирдек кенг қўлланилмайди. Масалан, фармакопея таҳлилида эмиссион спектрал таҳлил атом + абсорбцион, молекуляр абсорбцион спектроскопия, люминесцент, рефрактометрик, поляриметрик таҳлил ЭПР, ЯМР спектроскопия ва бошқа оптик усуллар нисбатан оз қўлланади.