Ҳәзирги күнде энергетика ресурсларынан өнимли пайдаланыўға дүняның барлық мәмлекетлеринде үлкен әҳмиет берилмекте

6. «ЭЛЕКТР МЕХАНИКАЛЫҚ СИСТЕМАЛАР ҲӘМ КОМПЛЕКСЛЕРДЕ ЭНЕРГИЯ ҮНЕМЛЕЎ» ПӘНИНЕН ЛАБОРАТОРИЯ ЖУМЫСЛАРЫ


КИРИЎ
«Электр механикалық системалар ҳәм комплекслерде энергия үнемлеў» пәнинен лаборатория жумысларын орынлаўдан мақсет ислеп шығарыўдың барлық тараўларында қолланылатуғын электр механикалық системалардың ислеў тийкарлары ҳәм оларды ислетиў даўамында энергия үнемлеўге ерисиў усыллары туўрысында талабалардың лекциялар даўамында алған теориялық билимлерди тәжирийбелер тийкарында беккемлеўден ибарат. Электр механикалық системалардың электр үскенелерин үйрениў, болатуғын физикалық процесслардиң мазмунын түсиниў, энергетикалық көрсеткишлериниң жүклениўге байланыслылығын тәжирийбе жолы менен анықлап, энергетикалық көрсеткишлерин басқарыўдың оптимал усылларын қоллаў орынланатуғын лаборатория шынығыўларының тийкарғы мақсети.
Сабақ шынығыўларында лаборатория жумысларына басланғыш таярлық көриў ушын тапсырмалар төмендеги ўазыйпаларды өз ишине алады: лаборатория жумысларын орынлаў ўақтында талабалардың қәўипсизлигин тәмийнлеўши қәўипсизлик техникасы қағыйдалары менен танысып шығыў, орынланатуғын жумыс темасы бойынша тийкарғы түсиниклер бөлими ҳәм керекли әдебиятлардан пайдаланып үйрениў, қадағалаў ушын сораўларға жуўап бериў, ҳәмде өлшеў нәтийжелерин жазыў ушын кестелерди сызып таярлаў.
Тәжирийбелер өткериў ўақтында алынған нәтийжелердиң көрсеткишлери менен электр аппаратлары ҳәм өлшеў әсбапларының техникалық көрсеткишлери салыстырылып көриледи, қәтеликлери анықланады.
Лаборатория шынығыўлары бойынша таярланған есабатта жумыстың мақсети баян етилген жазба сыпатлама, жумыс схемалары, алынған нәтийжелер кестелери, характеристикалары ҳәмде жумыс бойынша жуўмақлар келтириледи.


6.1. 1 – ЛАБОРАТОРИЯ ЖУМЫСЫ


НАСОС ҚУРЫЛМАЛАРЫ АСИНХРОН ЭЛЕКТР ЖҮРИТПЕЛЕРИНИҢ ҚУЎАТ КОЭФФИЦИЕНТИН АСЫРЫЎ


1. Жумысты орынлаўдан мақсет

1. Насос қурылма асинхрон электр жүритпеси қуўат коэффитциентиниң жүклениў дәрежесине байланыслығын тексериў ҳәм оны асырыў усылларын үйрениў.

2. Асинхрон мотор статор орамларына параллел жалғанған конденсаторлар батареясы сыйымлығының мотор қуўат коэффитциентине тәсирин тексериў.