Эшқурбонова мунисахон бозор қизи

II БОБ. ТАДҚИҚОТ ОБЪЕКТИ ВА УСУЛЛАРИ
2.1. Дастлабки моддалар ва тадқиқот усуллари
Тадқиқот ишини бажаришда “т” ва “кт” маркали реактивлардан фойдаланилди. Реактивлар эритмалари уларнинг аниқ тортимларини маълум ҳажмдаги эритувчиларда эритиб тайёрланди.
Синтез қилинган полимер лиганд намлиги ГОСТ-10898.1-84, сочма оғирлиги ГОСТ-10898.2-84, гидратланган ҳолатдаги сорбентнинг зичлиги ГОСТ-10898.3-84, бўккан сорбентларнинг солиштирма ҳажми ГОСТ-10898.4-84, статик алмашиниш сиғими ГОСТ-20255.1-89 бўйича аниқланди.
Лигандни потенциометрик титрлаш OP-211/1 pH-метри ва ЭВ-74 универсал иономерида амалга оширилди. Бунда OH-шаклдаги ионитнинг бир хил (0,25 г) тортимига 0,1 Н NaCl эритмасининг камайиб борувчи порцияси ва 0,1 Н HCl эритмасининг ортиб борувчи порцияси қўшилиб, ҳар бир колбадаги эриталарнинг ҳажми 25 мл га келтирилди ҳамда тортимлар эритмалари 7 сутка давомида қолдирилди. Шундан сўнг, эритмаларни потенциометрик титрлаб, мувозанатдаги эритманинг олинган pH қийматлари асосида pH қийматининг титрлаш учун қўшилган кислота ҳажмига боғлиқлигининг потенциометрик титрлаш егриси тузилди. Дастлабки моддалар ва ионитнинг ИҚ ютилиш спектрлари “Nicolet” фирмасининг AVIATAR-360 спектрометрида 400-4000 см^-1 соҳада ёзиб олинди. Намуналар KBr билан зичлаштирилган таблеткалар кўринишида қўлланди.
Лиганднинг термик турғунлиги дифференциал-термик ва гравиметрик усулларда Паулик-Паулик-Эрдей системали дериватографда 10 град/мин тезликда, Т-900, ТГ-200, ДТА – 1/10, ДТГ – 1/10 галванометр сезгирлигида, дериватограммани фотоқоғозга автоматик ёзиб олиш йўли билан ЎзФА умумий ва ноорганик кимё институтида ўрганилди. 60-80 мг массадаги ўрганиладиган намуна диаметри 10 мм бўлган қопқоқсиз платина тигелга жойлаштирилди. Эталон сифатида алюминий оксиддан фойдаланилди. Қиздиришнинг динамик режими атмосфера шароитида ўтказилди.
Турли металлар ионлари бўйича ионит алмашиниш сиғимининг қўшилаётган эритма рН ига боғлиқлиги қуйидагича аниқланди: 0,2 г ионит 150 мл ҳажмли колбага солиниб, 10 мл 0,05 н эритмаси ва турли миқдорда (0,5 дан 20 млгача) сульфат кислотанинг 0,1 н ли эритмаси ион кучи 1 бўлгунча қўшилди. Сорбцияланган металлар концентрацияси маълум методикалар ёрдамида аниқланди [140; 8-б, 141; 19,124-б].