E-ombor(E-aktiv)

“E-ombor(E-aktiv)” товар-моддий ресурслар ҳаракатини ҳисобга олиш электрон тизими яратилди
19/08/2021
Солиқ хизмати органлари томонидан “Солиқчи кўмакчи” тамойили асосида амалга оширилаётган чора-тадбирлар бозор иштирокчилари орасида тенг рақобат муҳитини шакллантириб, қонуний фаолият олиб бораётган тадбиркорларнинг узлуксиз ишлашларига, солиқ базаси кенгайиши ва бюджет тушумларига ижобий таъсир кўрсатмоқда.
Давлат солиқ қўмитаси томонидан синов тариқасида ишга туширилган “E-ombor” – товар-моддий ресурслар ҳаракатини ҳисобга олишнинг электрон ахборот тизими эса ушбу йўналишдаги ишларнинг навбатдагиси бўлди.
Ушбу тизим мамлакатимиз Президентининг жорий йил 2 июлда “Давлат харидлари шаффофлигини таъминлаш ва самарадорлигини оширишга доир қўшимча чора-тадбирлар тўғрисида”ги ПҚ-5171-сон қарорида белгиланган вазифалар ижроси доирасида яратилди.
“E-ombor(E-aktiv)” ахборот тизимида маҳсулотлар кирими ва қолдиғи ҳисобини реал вақт режимида шакллантириш ва онлайн кузатиб бориши мумкин.
Тадбиркорлар шахсий кабинетида “Менинг омборларим” бўлимида ўзига тегишли маҳсулотлар учун бир ёки бир нечта омбор яратиш имконига эга. Уларда омборлар рақами, номи, майдони, манзили, яратилган сана, ЖШШИР (ПИНФЛ) ва бошқа маълумотлар акс эттирилади. Омборларда маҳсулотлар номи, МХИК коди, ўлчов бирлиги миқдори ва суммаси аниқ кўрсатилади. Корхона шу асосда ҳар бир омбордаги маҳсулотлар тақсимотини белгилаш, у ёки бу омборга олиб ўтиши мумкин.
Маҳсулотлар кирими ва чиқими, қолдиғи, тақсимот жараёни бир вақтнинг ўзида солиқ органлари томонидан ҳам кузатиб борилади.
Яна бир эътиборли жиҳати, “E-ombor(E-aktiv)” ахборот тизими электрон ҳисобварақ-фактура тизимизга интеграция қилинган. Бунда мавжуд маҳсулотларни реализация қилишда электрон ҳисобварақ-фактурада товарларнинг (ишларнинг, хизматларнинг) идентификациялаш кодлари Маҳсулотлар (товар ва хизматлар) ягона электрон миллий каталогига мувофиқ акс эттирилишини ҳамда барча шартномалар Ягона электрон шартномаларнинг ахборот порталида мажбурий тартибда рўйхатдан ўтказилиши таъминланади.
Бу эса тадбиркорлик субъектлари томонидан кирим қилинмаган товарларни сотиш бўйича электрон ҳисобварақ-фактураларни расмийлаштириш ҳолатларини бартараф этади.
Қарорда давлат харидларини амалга ошириш жараёнлари алоҳида тартибда назорат қилинадиган 24 та корпоратив ва 7 та бюджет буюртмачилари рўйхати тасдиқланган.
Мазкур тизимнинг ишга туширилиши тадбиркорлик субъектларига бир қатор қулайликлар яратиш билан бирга, товарлар реализацияси устидан тизимли назорат ўрнатиш, корпоратив ва бюджет буюртмачиларида давлат хариди тизимини янада такомиллаштириш, коррупция омилларини бартараф этиш ҳамда яширин иқтисодиётни қисқартиришга хизмат қилади.