Е. Б. Бабский, А. А. Зубков, Г. И. Косицкий, Б. И. Ходоров

Из потенциаллари
Ҳаракат потенциали одатдагидек из потенциаллари билан давом этади. Уларни биринчи марта Д. С. Воронцов қайд қилган (1926), кейинчалик эса Ж. Эрлангер билан Г. Гассер ва бошқалар мукаммал текширган.
Манфий ва мусбат из потенциаллари тафовут қилинади. Манфий ва мусбат из потенциалларининг амплитудаси бир неча милливольтдан ошмайди. Из потенциаллари бир неча миллисекунддан бир неча ўн секундгача ва ҳатто юзлаб миллисекундгача давом этади. Из потенциаллари қўзғалиш тамом бўлгач нерв ва мускул толаларида секин тараққий этувчи тикланиш процесслари билан боғланган.
Ҳаракат потенциали ва манфий из потенциали ўртасидаги ўзаро муносабатларни скелет мускул толасининг ҳаракат потенциали мисолида кўриб чиқиш мумкин. 118-расмда келтирилган ёзувдан кўринадики, реполяризация фазаси узоқлиги жиҳатдан тенг бўлмаган икки қисмга ажратилади. Мембрана реполяризацияси дастлаб тез бориб, кейин секинлашади ва тўхтаб қолади. Манфий из потенциалининг бошланиши шу пайтга тўғри келади (в). Мембрана бир оз вақт мобайнида қисман деполяризацияланиб қолади, тахминан 15 мсек дан кейингина мембрана потенциали дастлабки миқдор—85 мв гача тўла тикланади. Манфий из потенциалини кўпинча мембрананинг из деполяризацияси деб аташади.
Мусбат из потенциали мембрананинг ўта кутбланишида, яъни нормал қутбланишининг кучайишида — (гиперполяризациясида) ифодаланади. Бу потенциал миелинсиз нерв толаларида айниқса яққол кўринади . Масалан, кальмарнинг миелинсиз гигант аксонида ҳаракат потенциалининг тушувчи фазаси бевосита мусбат из потенциалига ўтади, бу потенциалнинг амплитудаси тахминан 15 мв га етади, фақат кейинчалик мембрана потенциали тинчлик ҳолатидаги (бошланғич) миқдорига қайтади (119-расм).
Миелинли нерв толаларида из потенциалининг ўзгаришлари мураккаброқ: манфий из потенциали кўпгина ҳолларда мусбат из потенциали билан алмашинади, сўнгра баъзан янгидан манфий зарядли потенциал вужудга келади, фақат шундан кейингина тинчлик потенциали тўлиқ тикланади.
Нерв бир текис (ритм билан) таъсирланганда из потенциаллари йиғилади (жамланади), шу туфайли уларнинг амплитудаси ва узунлиги ошади (120-расм).