Denov tadbirkorlik va pedagogika instituti tarix va falsafa kafedrasi

1881 йилда Амир Музаффар ўғли Абдулаҳадни тахт меросхўри деб эълон қилди ва ўша йили уни Россия императори Александ Александоровичнинг тахтга ўтириш маросими тантанасига қатнашиш учун Москвага жўнатди. Подшо Александр III га Бухоро юлдузи ордени топширилди ва Абдулаҳад ҳақиқий тахт вориси сифатида Россия томонидан тасдиқланди.
1883 йилда эса амир Музаффар Россия империясининг I-даражали Муқаддас Анна ордени билан тақдирланди. Архив маълумотларига қараганда, бу мукофотни Бухорога империянинг нуфузли амалдорларидан бири – генерал-майор, князь Витгенштейн бошчилигидаги махсус элчилар гуруҳи олиб келган.
Амир Музаффар 1885 йил 31 октябрда касаллик туфайли вафот этади. Унинг ўғли амир Саййид Абдуллаҳад 1885-1910 йиллар Бухоро амирлиги тахтини бошқарди. Абдулаҳад 14 ёшидан бошлаб Кармана беки этиб тайинланган. Рус сайёҳларининг маълумотларига кўра у Карманада жуда оддий кун кечирган. 1885 йил 4 ноябрда амир Саййид Абдуллаҳадни Бухоро аркида оқ кигизга ўтирғизиб, тахтга ўтқазиш маросими бўлиб ўтди.
Бухоро амири Саид Баҳодир Абдулаҳадхон (1885―1910) тез-тез Петербург, Москва ва Қримга сафарлар қилиб, рус императори ҳамда унинг мулозимларига қимматбаҳо совғалар тортиқ қилиш одатини чиқарди. Петербургдаги олий амалдорлар ҳам амир совғаларига ўрганиб қолдилар. Улар Бухорога турли баҳоналар билан сафарлар қилишга одатланишди. Амир ҳар гал уларга шоҳона зиёфатлар қилар ва катта совғалар берарди. Амир Абдулаҳадхон ўз унвони ва мартабаси билан Туркистон генерал-губернаторидан ҳам ўзиб кетди. У генерал-губернаторда бўлмаган олий унвон ва мартабани рус императоридан олган.
Генерал-адъютант, кавалерия генерали (генерал-полковникка тенг), «Зоти олийлари» зодагонлик мартабасига кўтарилган Абдулаҳадхон Петербургнинг киборлари кўз ўнгида буюк рус князларидан ҳам юқори турган. У империянинг энг олий «Андрей Первозванний» ордени соҳиби бўлган. Терек казак қўшини фахрий атамани ва 5- Оренбург казак полкининг оталиғи лавозимига тайинланган. У шундай мавқеи туфайли ўзининг бевосита бошлиғи― Туркистон генерал-губернатори билан ҳасоблашмай, барча муҳим масалаларни бевосита Петербург билан ҳал қилаверган.