Dawletmuratov Adilbay Mirzabaevich

Reklama quralında básekilesiw. Firmalar óz tovarlarına qarıydar itibarın tartıwı ushın olardı reklama quralında kórsetedi, óz tovarınıń abzallıqların qarıydarlarǵa jetkeredi.
Básekiniń aytılǵan usıllarınan tısqarı insapsız (nızamsız, hadal emes) usılları da qollanıp turıladı. Ózbekstan Respulikası “Báseki haqqında”ǵı nızamında “insapsız báseki – xojalıq júrgiziwshi subekttiń yamasa shaxslar toparınıń ekonomikalıq xızmetin ámelge asırıwda abzallıqlarǵa iye bolıwǵa qaratılǵan, nızam hújjetlerine qarsı bolǵan hámde basqa xojalıq júrgiziwshi subektlerge (básekileslerge) zıyan keltiretuǵın yamasa zıyan keltiriwi múmkin bolǵan háreketler”¹², dep keltirilgen. Básekiniń unsapsız usıllarına sanaat jansızlıǵı, yaǵnıy básekilesiniń finanslıq jobaları, jańalıq – “nou-xau”ları hám basqa sırların urlaw; básekilesin shiyki zat bazarlarınan, transporttan ayırıw; básekiles kárxanasında diversiyalar shólkemlestiriw, ǵalaba xabar qurallarınan básekiles ónimleriniń abırayın túsiriw ushın paydalanıw, reketti iske salıw hám basqalar kiredi.
Bul usıllar tábiyatı boyınsha mádeniyatlasqan bazar ekonomikasına tán emes, olar qadaǵan etiledi, onı qollanǵanlar imidjin joytadı, olar nızamshılıq jolı menen jazalanadı.
Bazar sisteması sharayatında báseki háreket etkenlikten onıń qatnasıwshıları oǵan tayar turadı. Hár bir qatnasıwshı onıń básekilesi ne isley alıwın biliwge hám oǵan qarsı ilaj kóriwge umtıladı. Bul ilajlar firmanıń báseki strategiyasında óz ornın tabadı.
Óz-ara gúreste jeńip shıǵıw ushın onıń qatnasıwshıları básekige shıdamlı bolıwı kerek.




¹² Ózbekistan Respublikası nızam hújjetleri toplamı, 2012 j.

Básekige shıdamlılıq – bul básekige shıdamlı bolıw, onda jeńip shıǵıw qábiletine iye bolıw.

Bul úsh jaǵday menen belgilenedi:

1. 
   málim tovardıń básekige shıdamlılıǵı;
   
2. 
   firmanıń básekige shıdamlılıǵı;
   
3. 
   milliy ekonomikanıń básekige shıdamlılıǵı.