Da'vogar A. A. Xodjaeva javobgar D. M

2-variant

Da'vogar A.A.Xodjaeva javobgar D.M.X odjaevga nisbatan nikohdan ajratish haqida o'zining yashash joyidagi fuqarolik ishlari bo'yicha Yakkasaroy tumanlararo sudiga BHMning 2 baravari miqdorida davlat boji to'lab, da'vo arizasi bilan murojaat qildi. Sud da'vo arizasini FPKning 195-moddasi 1-qism 3-bandiga muvofiq ish mazkur sudning sudloviga tegishli bo'lmaganligiga asosan qaytardi. Shundan so'ng da'vogar A.A.Xodjaeva javobgar D.M.Xodjaevning yashash joyidagi fuqarolik ishlari bo'yicha Mirobod tumanlararo sudiga BHMning 1 baravari miqdorida davlat boji to'lab, da'vo arizasi bilan murojaat qildi. Sud taraflarga yarashib olish uchun besh (5) oy muhlat tayinladi va ishni sud majlisida ko'rish 2021 yil 17 yanvar` soat 10:00 ga qadar to'xtatib turish to'g'risida ajrim chiqardi. 2021 yil 17 yanvar` soat 10:00da ish yuritish tiklandi. Sudda aniqlangan holatlarga ko'ra, taraflar 2008 yil 1 mart kuni qonuniy nikoh tuzganlar. Birgalikdagi turmushlaridan uch nafar farzandlari bor. O'rtalaridagi oilaviy munosabatlar 2020 yil tugatilgan, alohida yashab kelmoqdalar, sudning yarashish uchun bergan muddati davomida taraflar kelishib ketishmagan.

Sudning hal qiluv qaroriga binoan da'vogar A.A.Xodjaevaning javobgar D.M.Xodjaev bilan nikohdan ajratish haqidagi da'vo arizasi qanoatlantirilib, taraflaning uch nafar farzandi onasi A.A.Xodjaevaning tarbiyasida qoldirilgan, ushbu voyaga yetmagan uch nafar farzandi uchun javobgar D.M.Xodjaev har oyda har biriga 220000so'mdan aliment to'lashi belgilangan, nikohdan ajratish haqida guvohnoma berilayotganda javobgar D.M.Xodjaevdan ba'zaviy hisoblash miqdorining uch baravari miqdorida va ishning alimentga oid qismi yuzasidan 312912 so'm miqdorida davlat boji undirilishi belgilangan, hal qiluv qaroriga nisbatan u qabul qilingan kundan e'tiboran bir oy ichida Toshkent shahar sudi fuqarolik ishlari bo'yicha sudlov hay'atiga apellyatsiya shikoyati (protesti) berilishi mumkinligi ko'rsatilgan.

Javobgar D.M.Xodjaev hal qiluv qarorining aliment bilan bog'liq va farzandlarining kimning tarbiyasida qolishi masalalariga oid qismidan norozi bo'lib, apellyatsiya shikoyati yozdi va o'z shikoyatini yuqoridagi masalalar da'vogarning da'vo arizasida keltirilmaganligini, sud o'z tashabbusi bilan ushbu masalalarni ko'rib chiqolmasligi bilan izohladi.

Vaziyatga huquqiy baho bering. Sudning xatti-harakatlarini tahlil qiling.