Davlat va huquq nazariyasi modulidan YaN (yakuniy nazorat) kazuslari Kazus 1

Davlat va huquq nazariyasi modulidan YaN (yakuniy nazorat) kazuslari


Kazus 1
Shavkat Mirziyoyev 27-aprel kuni Toshkent xalqaro investitsiya forumi doirasida Islom taraqqiyot banki prezidenti Muhammad bin Sulaymon al-Jassirni qabul qildi. O‘zbekiston prezidenti matbuot xizmatiga ko‘ra, yangi o‘rta muddatli sheriklik dasturi doirasida bank guruhi bilan hamkorlikni yanada kengaytirish masalalari muhokama qilindi.
Ta’kidlanishicha, bugungi kunda qo‘shma loyihalar portfeli iqtisodiyotning ustuvor tarmoqlarini qamrab olgan holda 1,3 milliard dollardan oshgan. Forum doirasida qishloq va transport infratuzilmasini modernizatsiya qilish, maktabgacha ta’limni rivojlantirish bo‘yicha loyihalarni amalga oshirish yuzasidan umumiy qiymati 400 million dollarlik bitimlar imzolandi.
Uchrashuvda, shuningdek, amaliy hamkorlikni rivojlantirish, tadbirkorlik va xususiy investitsiyalarni qo‘llab-quvvatlash, moliyaviy vositalarni takomillashtirish, bank tuzilmalarini loyiha ishlariga faol jalb qilish borasida aniq loyihalarni ilgari surish, mamlakatning JSTga qo‘shilishi va innovatsion ekotizimni yaratish masalalarida texnik ko‘makni kengaytirishga alohida e’tibor qaratildi.
Shu yilning mart oyida Islom taraqqiyot banki O‘zbekistondagi qishloq joylarni rivojlantirish uchun 200 mln dollar ajratgandi. Loyihada 113 ta qishloqni rivojlantirish, yo‘l-transport infratuzilmasi, muhandislik-kommunikatsiya tarmoqlarini, elektr ta’minoti tizimini yaxshilash rejalashtirilgan.
Savollar:
1. Birinchi bandda belgilangan munosabatlar huquqiy munosabatlar hisoblanadimi? Agar shunday bo'lsa, huquqiy munosabatlarni tahlil qiling, ular qaysi darajaga tegishli.
2. “Forum davomida... 400 million dollarlik bitimlar imzolandi”. Ushbu shartnomani tartibga solish mexanizmi bo'yicha imzolanishiga olib kelgan jarayonni tushuntiring.
3. “Bank tuzilmalarini loyiha ishlariga faol jalb etish nuqtai nazaridan aniq loyihalarni ilgari surish” iborasiga huquqiy izoh berishga harakat qiling.