Давлат божхона хизмати органларига

ЎЗБЕКИСТОН РЕСПУБЛИКАСИНИНГ ЯНГИ ТАХРИДАГИ “ДАВЛАТ БОЖХОНА ХИЗМАТИ ТЎҒРИСИДА”ГИ ҚОНУНИ
Ўзбекистон Республикасининг янги тахридаги “Давлат божхона хизмати тўғрисида”ги Қонуни (18.10.2018 йил, 502-сон) Давлат божхона хизмати органлари фаолиятининг ҳуқуқий асосларини белгилаб беради. Қонун 37 та моддадан иборат.


ЎЗБЕКИСТОН РЕСПУБЛИКАСИНИНГ БОЖХОНА КОДЕКСИ
Ўзбекистон Республикасининг Божхона Кодекси 2016 йил
20 январдаги ЎРҚ-400-сон Қонуни билан тасдиқланган ва расмий эълон қилинган кундан эътиборан уч ой ўтгач кучга кириши белгиланган (“Халқ сўзи” газетасининг 2016 йил 21 январдаги 14 (6449)-сонида эълон қилинган).
Кодекс Ўзбекистон Республикасининг божхона чегараси орқали товарлар ва транспорт воситаларини олиб ўтиш, божхона тўловларини ундириш, божхона расмийлаштируви, божхона назоратини амалга ошириш, шунингдек божхона тўғрисидаги қонун ҳужжатларини бузиш ҳолларининг олдини олиш, уларни аниқлаш ва уларга чек қўйиш тартибини белгилаш билан боғлиқ муносабатларни тартибга солади. Қисқача айтганда, Божхона кодексида божхона ишини тартибга солувчи нормалар ўз аксини топган. Кодекс 12 та бўлим, 59 та боб ва 412 та моддадан иборат (Аввалги Божхона Кодекси 1997 йил 26 декабрда қабул қилинган. 1998 йил 1 мартдан кучга кирган. 11 та бўлим, 19 та боб, 198 та моддадан иборат бўлган).
ЎЗБЕКИСТОН РЕСПУБЛИКАСИ ДАВЛАТ БОЖХОНА ХИЗМАТИ ОРГАНЛАРИНИНГ БАЙРОҒИ ВА ФАРҚЛАШ БЕЛГИСИ:


1. Ўзбекистон Республикаси Давлат божхона хизмати органларининг байроғи

Узунлиги — 250 см Эни — 125 см. Ўзбекистон Республикаси Вазирлар Маҳкамасининг 2018 йил 7 августдаги 630-сон қарорига асосан тсдиқланган

Ў збекистон Республикаси Давлат божхона хизмати органларининг байроғи тараққиёт ва барқарорликни ифода этувчи оч яшил рангли тўғри бурчакли мато кўринишига эга.

Байроқ марказида Ўзбекистон Республикаси Давлат божхона органларининг фарқлаш белгиси тасвирланган.


2. Ўзбекистон Республикаси Давлат божхона хизмати органларининг фарқлаш белгиси

Ўзбекистон Республикаси Вазирлар Маҳкамасининг 2018 йил 7 августдаги 630-сон қарорига асосан тсдиқланган

Ўзбекистон Республикаси Давлат божхона хизмати органларининг фарқлаш белгиси мустаҳкамлик ва доимийликни ифода этувчи кумуш рангли саккиз қиррали шаклга эга бўлиб, унинг ички қисмида саккиз қирраликдан оқ рангли ҳалқа билан ажратилган яшил рангдаги доирасимон чизиқ билан ўралган кумуш рангли глобус тасвирланган.
Доирасимон чизиқнинг юқори қисмида оқ рангли бош ҳарфлар билан лотин алифбосида «O‘ZBEKISTON RESPUBLIKASI», пастки қисмида «DAVLAT BOJXONA XIZMATI» сўзлари ёзилган. Ёзувлар саккиз қиррали олтинсимон рангли иккита юлдуз билан ажратилган.
Глобуснинг марказида Ўзбекистон Республикасининг иқтисодий манфаатларини биргаликда ҳимоя қилишни ва иқтисодий хавфсизлигини таъминлашни, шунингдек, жаҳоннинг барча мамлакатлари билан савдо муносабатларини ривожлантириш ва мустаҳкамлаш маъносини англатувчи бронза рангидаги Ўзбекистон Республикаси харитаси тасвирланган, унинг марказида ўткир тиғи билан пастга қараган вертикал ҳолатдаги тилла рангли икки томонидан илонлар билан ўралган қанотли таёқ (Меркурий таёғи) тасвирланган.


БОЖХОНА ҲУДУДИ
Ўзбекистон Республикасининг қуруқликдаги ҳудуди, ҳудудий ва ички сувлари ҳамда улар устидаги ҳаво ҳудуди Ўзбекистон Республикасининг божхона ҳудудини ташкил этади (эркин божхона зоналари ва эркин омборлари ҳудуди божхона ҳудудидан ташқарида)