Давлат божхона хизмати органларига

АҲОЛИ ДАРОМАДЛАРИ - аҳолининг маълум вақт давомида пул ва натура шаклида олган даромадлари миқдоридан иборат. АД га иш хақи, тадбиркор даромади, пенсия, нафақа, стипендия, капиталдан олинадиган фойда, пулдан олинган фоиз, девиденд, рента, кўчмас мулк, қишлоқ хўжалик маҳсулотини, ҳунармандчилик буюмларини сотиш ва ҳар хил хизматлар кўрсатишдан олинган даромадлардир.


АСОСИЙ МАКРОИҚТИСОДИЙ КЎРСАТКИЧЛАР
1.Миллий даромад – ялпи ички маҳсулотнинг 1 йил давомида янгидан яратилган қиймати, ёки соф маҳсулот йиғиндиси.
2.Ялпи даромад – иш ҳақи ва соф даромаддан ташкил топган янгитдан яратилган қиймат; тушум ва ишлаб чиқариш ҳаражатлари ўртасидаги фарқ.
3.Ялпи ички маҳсулот – бу йил давомида мамлакат ичида ишлаб чиқарилган тайёр товарлар ва кўрсатилган хизматларнинг пул кўринишидаги қиймати.
4.Ялпи миллий маҳсулот (ЯММ) – бу мамлакатда ва унинг ташқарисида жойлашган миллий корхоналарда ишлаб чиқарилган барча товар ва хизматлар қийматининг бозор баҳосидаги йиғиндисидир.
5.Соф миллий маҳсулот (СММ) – ЯММ билан амортизация ажратмалари ўртасидаги фарқ.


БАРТЕР
Бартер – (ингл. Bаrtеr), бир ёки бир неча товарларни қийматига кўра бошқа товар (ёки товарлар)га нақд пулсиз айирбошлаш.


БЮДЖЕТ. БЮДЖЕТ ТИЗИМИ.
Давлат бюджети – давлат пул маблағларининг (шу жумладан давлат мақсадли жамғармалари маблағларининг) марказлаштирилган жамғармаси бўлиб, унда даромадлар манбалари ва улардан тушумлар миқдори, шунингдек, молия йили мобайнида аниқ мақсадлар учун ажратиладиган маблағлар сарфи йўналишлари ва миқдори назарда тутилади.
Бюджет тизими турли даражадаги бюджетлар ва бюджет маблағлари олувчилар йиғиндисини, бюджетларни ташкил этишни ва тузиш принципларини, бюджет жараёнида улар ўртасида, шунингдек бюджетлар ҳамда бюджет маблағлари олувчилар ўртасида вужудга келадиган ўзаро муносабатларни ўзида ифодалайди.
Давлат бюджети республика бюджети ҳамда Қорақалпоғистон Республикаси бюджетини ва маҳаллий бюджетларни ўз ичига олади.
Давлат бюджети таркибида давлат мақсадли жамғармалари жамланади.
Қорақалпоғистон Республикаси бюджети Қорақалпоғистон Республикасининг республика бюджетини ҳамда республикага (Қорақалпоғистон) бўйсунувчи туманлар ва шаҳарлар бюджетларини ўз ичига олади.
Вилоятнинг бюджети вилоят бюджетини, вилоятга бўйсунувчи туманлар ва шаҳарлар бюджетларини ўз ичига олади.
Туманларга бўлинадиган шаҳарнинг бюджети шаҳар бюджетини ва шаҳар таркибига кирувчи туманлар бюджетларини ўз ичига олади.
Туманга бўйсунадиган шаҳарлари бўлган туманнинг бюджети туман бюджетини ва туман бўйсунувидаги шаҳарлар бюджетларини ўз ичига олади.