Darsliklar asosida davlat va huquq

190-modda. Xodimning sog‘lig‘iga shikast yetganligi munosabati bilan to‘lanishi lozim bo‘lgan zarar miqdori
To‘lanishi lozim bo‘lgan zarar jabrlanuvchining mehnatda mayib bo‘lishiga qadar olgan o‘rtacha oylik ish haqiga nisbatan foiz hisobida, uning kasbga oid mehnat qobiliyatini yo‘qotganlik darajasiga muvofiq belgilanadigan har oylik to‘lovdan, sog‘lig‘iga shikast yetishi bilan bog‘liq qo‘shimcha xarajatlarning kompensatsiyasidan, shuningdek belgilangan hollarda esa, — bir yo‘la beriladigan nafaqa to‘lashdan iboratdir.
Kasbga oid mehnat qobiliyatini yo‘qotganlik darajasi va jabrlanuvchining qo‘shimcha yordam turlariga muhtojligi tibbiy-mehnat ekspertiza komissiyasi (TMEK) tomonidan aniqlanadi.
Zarar o‘rnini qoplash uchun to‘lovlarni tayinlashda jabrlanuvchi olayotgan ish haqi, stipendiya, pensiya va boshqa daromadlar hisobga olinmaydi. Bunda mehnatda mayib bo‘lgan jabrlanuvchilar — nogironlarga zararni qoplash uchun to‘lanadigan summa qonun hujjatlarida belgilangan mehnatga haq to‘lash eng kam miqdorining 17,6 foizidan oz bo‘lishi mumkin emas.
20-vaziyat.
S.ni 2 oylik sinov muddati bilan tarjimon sifatida ishga qabul qilishdi. Sinov muddati tugashiga ikki kun qolganda, unga ma’muriyat sinov muddatini yana bir oyga cho‘zish to‘g‘risida qaror qabul qilgani e’lon qilindi.Ikki haftadan keyin korxonaga tarjimon sifatida boshqa xodim ishga qabul qilindi, S.ga esa u sinov muddatiga bardosh bermagani uchun ishdan bo‘shatilgani ma’lum qilindi.Mazkur holda mehnat qonunlari buzilganmi? Mazkur ishdan bo‘shatish S. huquqlarini buzish hisoblanadimi? Agar shunday bo‘lsa, S. o‘z huquqlarini qay tarzda himoya qila oladi?Bunda Mehnat Kodeksining quyidagi moddalarini keltirish mumkin.
85-modda. Dastlabki sinov muddati
Dastlabki sinov muddati uch oydan oshib ketishi mumkin emas.
Vaqtincha mehnatga qobiliyatsizlik davri va xodim uzrli sabablarga ko‘ra ishda bo‘lmagan boshqa davrlar dastlabki sinov muddatiga kiritilmaydi.
86-modda. Dastlabki sinov davrida xodimlarga mehnat to‘g‘risidagi qonun hujjatlarining tatbiq etilishi
Dastlabki sinov davrida xodimlarga mehnat to‘g‘risidagi qonun hujjatlari va korxonada o‘rnatilgan mehnat shartlari to‘liq tatbiq etiladi.
Dastlabki sinov davri mehnat stajiga kiritiladi.