Darsliklar asosida davlat va huquq

DARSLIKLAR ASOSIDA DAVLAT VA HUQUQ
ASOSLARI FANIDAN 8-9-10-11-SINFLARGA MO‘LJALLANGAN HUQUQIY VAZIYATLARGA YECHIM

Buxoro 2021

Tuzuvchilar:
H.Qobilova- Buxoro viloyat xalq ta’limi bo‘limi ijtimoiy fanlar metodisti
Z.Aminova-Buxoro shahar 29-IDUMning huquq fani o‘qituvchisi
Taqrizchilar:
I.Shoev-Buxoro Davlat universiteti huquq fani o‘qituvchisi
J.G‘ulomov-Notarius xodimi
Z.Muratova-Buxoro shahar skolioz bilan kasallangan bolalar uchun ixtisoslashgan sanatoriy turidagi 23-son maktab-intrnatning ona tili va adabiyot fani o‘qituvchisi.


Respublika Ta’lim Markazi qoshidagi Ijtimoiy fanlar ilmiy metodika Kengashining 2021-yil 31-martdagi 1-sonli qarori bilan ommalashtirilgan.

Qonun ustuvorligi va inson manfaatlarini ta’minlash-yurt taraqqiyoti va xalq farovonligining garovi
Shavkat Mirziyoyev
KIRISH
Huquqiy bilim berishni yo‘lga qo‘yish orqali huquqiy madaniyatning yuksalishiga erishiladi, boshqacha qilib aytganda, tom ma’nodagi huquqiy ong shakllantiriladi.
Mustaqil davlatimizning rivojlanish istiqbollari har tomonlama bilimli, yuqori malakali yoshlar qo‘lida bo‘lib, bu ulardan yuksak huquqiy ong va huquqiy madaniyatga ega bo‘lish, huquqni puxta bilishni talab qiladi. Huquqiy davlatning eng muhim shartlarining biri bu – yuksak darajadagi huquqiy madaniyatning bo‘lishidir.
Huquqiy madaniyatni yuksaltirish haqida qanchalik tugal va mukammal nazariy fikrlar bildirilmasin, ularni shaxs huquqiy ongiga singdirish borasida muntazam hamda tizimli ish olib borilmasa, ko‘zlangan maqsadlarga erishib bo‘lmaydi.
Shu maqsadda O‘zbekiston Respublikasi Prezidentining 2019 yil 9-yanvar kungi “Jamiyatda huquqiy ong va huquqiy madaniyatni yuksaltirish tizimini tubdan takomillashtirish to‘g‘risidagi PF-5618-sonli Farmoni imzolandi.
Jamiyatda huquqiy ong va huquqiy madaniyatni yuksaltirib borish qonun ustuvorligini ta’minlash va qonuniylikni mustahkamlashning eng muhim shartlaridan biri hisoblanadi.
So‘nggi yillarda milliy huquq tizimini tubdan isloh qilish, jamiyatda huquqiy madaniyatni shakllantirish hamda malakali yuridik kadrlarni tayyorlash borasida sezilarli ishlar amalga oshirildi.
O‘quvchi-yoshlarga huquqiy ta’lim berish, ularda milliy huquq tizimi to‘g‘risidagi tasavvurlarni uyg‘otish, huquqiy madaniyatni yuksaltirish, qonun ustuvorligini anglash, huquqiy davlat hamda fuqarolik jamiyatini yuzaga keltirishda ta’lim muassasalarining hamda pedagoglarning o‘rni alohida mazmun kasb etadi.
Shu o‘rinda o‘quvchilarda huquqiy madaniyatni shakllantirish maqsadida hamda voyoga yetmaganlar o‘rtasida huquqbuzarliklarni oldini olishda, huquqning o‘rni beqiyos. Zero har bir yosh, o‘zini yoshi bilan bog‘liq huquqbuzarliklarni qanday oqibatlarga olib kelishini anglab yetsa va huquqiy madaniyatga ega bo‘lsa, jamiyatda qonun ustuvor bo‘ladi.
Fuqarolarning huquqiy ongi va huquqiy madaniyatini yuksaltirishga doir ishlar samaradorligini yanada takomillashtirish, fuqarolarning ijtimoiy-siyosiy o‘zgarishlar bilan uyg‘un ravishda huquqiy bilimlarini oshirib borishning zamonaviy usullarini joriy etish, shuningdek, o‘quvchilar, ayniqsa, yoshlarni zararli axborotlardan himoya qilish bo‘yicha mustahkam huquqiy immunitetni shakllantirish maqsadida mazkur “Huquqiy vaziyatlarga yechimlar” qo‘llanmasi yaratildi va voyaga yetmaganlar o‘rtasida sodir bo‘layotgan huquqbuzarliklarning oqibatlarini anglab yetishda yordam beradi.