Chet el bolalar adabiyoti

CHET EL BOLALAR ADABIYOTI.

REJA: 1. Chet el bolalar adabiyoti. 2. Badiiy ertak asoschisi sifatida ma’lum va mashxur shoir va tanqidchi. (Sharl Perro). 3. Aka-uka Grimmlar hayoti va ijodi. 4. Inson ma’naviy olamining mussavviri deb e’tirof etilgan shoir Aleksandr Sergeyevich Pushkin. 5. Xans Kristian Andersen ijodiy faoliyati.

Chet el bolalar adabiyoti. Mustaqil mamlakatimizda kattalar adabiyotining ajralmas bir bo’lagi bo’lgan bolalar adabiyotining rivojlanishi, har tomonlama boyib borishida tarjima asarlarining o’rni, ahamiyati katta. Negaki tarjima asarlarini o’qigan har bir yosh kitobxonning dunyo qarashi, fikri, tasavvuri boyib, o’sha xalqlarning yashash sharoitlari, urf-odatlari, orzu-intilishlari bilan oshno bo’ladi. Asrlar osha xuddi ertak kabi eldan elga, tildan tilga o’tib, dillarni yashnatib yurgan, “Qizil shapkacha” (Sh. Perro), “Robinzon Kruzo” (D. Defo), “Gulliverning sayohatlari” (J. Svift), “Dyumchaxon” (X. Andersen), “Oltin baliq” (A. S. Pushkin) kabi asarlar yosh qalblarda olamga nisbatan qiziqishlarini jo’sh urdirib yuboradi.

XX asrda bunyod etilgan “Maugli” (R.Kipling), “Kichikina Shahzoda” (A. de Sent-Ekzyuperi), “Vinni Pux” (A. Miln), “Axmoq sichqoncha haqida ertak” (S. Marshak), “Uch baqaloq” (Y. Olesha), “Doktor Aybolit” (K. Chukovskiy), “ Kim bo’lsam ekan?” (V. Mayakoviskiy), “Bilmasvoy quyosh shahrida” (N. Nosov) singari olam kezib yurgan asarlar o’zbek kitobxon bolalarida katta taassurot qoldirmoqda. Yuqorida tilga olingan asarlar yosh kitobxonni nimagadir o’rgatadi, nimagadir da’vat etadi. Bu asarlarning ko’pchiligida ona-Vatanga muhabbat, uning ozodligi va baxti uchun jon fido qilish (“Uch baqaloq”), noshukr bo’lmaslik, ota-ona pand-nasihatiga quloq solish (“Axmoq sichqoncha haqida ertak”), inson va insonga mehr (“Maugli”), tabiatni asrash, hayvonot olamini sevish (“Doktor Aybolit”), o’ziga pishiq puxta bo’lish, ichki sirlarini o’zgalarga oshkor qilmaslik (“Qizil shapkacha”), namunali o’qish, kasb-hunar egasi bo’lish (“Kim bo’lsam ekan”) dek oliyjanob g’oyalarning yotishi bolalarning tarjima asarlariga nisbatan bo’lgan qiziqish va ishtiyoqini o’stiradi.