Buxgalteriya hisobi, auditorlik faoliyati, buxgalter va auditor kasblari haqida tushuncha

6.5. Zamonaviy innovatsion ta’lim tizimi
Taraqqiyot tasodif emas,
balki zaruratdir.
G.Spenser.
Hozirgi globallashuv davrida talaba yoshlarning axborot olish imkoniyatlari juda katta. Eski, an’anaviy pedagogik texnologiyalarni qo‘llagan holda ma’ruza o‘qish yoki talabalarga haddan tashqari pand-nasihatlar berishga o‘tib ketish ta’lim sifatini yomonlashtiradi. Masalan, ma’ruza jarayonida asosiy mavzu bir yoqda qolib, faqat «mening davrimda unday edi, bunday edi... », «hozirgi yoshlar... » qabilidagi gaplarga berilib ketish hollari ham uchraydi. Aslida, ot aravaning old tomonidan qo‘shiladi, aravaning orqasidan qo‘shilgan ot uni yurita olmaydi.
Domla o‘zi o‘qita oladigan emas, talaba tushunadigan, uni hayratlantiradigan qilib o‘qitishi lozim. Aristotel ta’biri bilan aytganda, «bilim olish hayratlanishdan boshlanadi».
Buning uchun ta’lim jarayonini innovatsion pedagogik va yangi axborot texnologiyalari asosida modernizatsiyalashni yanada rivojlantirish lozim.
Ta’lim sohasida innovatsion faoliyatni tashkil etish va samarali boshqarish muammolarini o‘rganish va tahlil qilish makroiqtisodiyot va tarmoqlar darajasida ham, alohida xo‘jalik yurituvchi subekt darajasida ham muhim ahamiyat kasb etmoqda.
Darhaqiqat, talim sohasi eng innovatsiya talab tarmoqlardan biri bo‘lib, milliy iqtisodiyotimizning boshqa tarmoqlarida innovatsion faoliyatning samaradorligi, innovatsion muhitni yaratish va butun iqtisodiyotning raqobatbardoshligi avvalo, ta’lim jarayonida innovatsiyalarni rivojlantirishga bog‘liq.
Boshqacha aytganda, iqtisodiyotning turli tarmoqlarida va faoliyat sohalarida innovatsion jarayonlarning tavsifi, tezligi va samaradorligi ko‘p jihatdan ta’lim sohasidagi innovatsion faoliyatni tashkil etish va rivojlantirish hamda uning samaradorligini oshirishga bog‘liq.
Ta’lim sohasida innovatsiyalarni amalga oshirish va targ‘ib qilish jarayonida yangi, innovatsion ta’lim tizimi shakllanadi va rivojlanadi.
Xo‘sh, innovatsion ta’lim tizimi nima?