Bulardan tashqari, tovush o'zgarishlarining yana quyidagi ko’rinishlari mavjud

R A V I S H

Ona tili (5-sinf)

Qanday?, qancha?, qachon? singari so‘roqlarga javob bo‘lib, harakatning holati, daraja-miqdorini bildirgan so‘zlar ravish sanaladi.

Ravish, asosan, fe’lga bog‘lanadi va gapda ko‘proq hol vazifasida keladi.

Ona tili (6-sinf)

Harakat-holatning bajarilish tarzi, payti, o‘rni, daraja miqdori kabi belgilarini bildiruvchi va qanday? qachon? qayer? qancha? singari so‘roqlarga javob bo‘luvchi so‘zlar ravish deyiladi.

Ravishlarning ma’no jihatdan turlari

Ona tili (6-sinf)

Ravishlar ma’nosiga ko‘ra holat, payt, o‘rin, miqdor-daraja, maqsad-sabab ravishlariga bo‘linadi.

Ataylab, atayin, noiloj, noilojlikdan, jo‘rttaga, qasddan kabi ravishlar maqsad-sabab ravishlari hisoblanib, ularning miqdori u qadar ko‘p emas.

Harakat-holatning qanday holda bajarilganligini bildirgan va qanday? qay holda? qay tarzda? so‘roqlariga javob bo‘luvchi ravishlarga holat ravishlari deyiladi.

Holat ravishlariga jim, yayov, chindan, qo‘qqisdan, to‘satdan, piyoda, majburan, tasodifan, astoydil, eskicha, qatorasiga, birma-bir, yakkama-yakka, yonma-yon, bafurja, arang, zo‘rg‘a, mardlarcha singari so‘zlar kiradi.

Harakat-holatning bajarilish yoki bajarilmaslik paytini bildirib, qachon? so‘rog‘iga javob bo‘luvchi ravishlar payt ravishlari sanaladi.

Payt ravishlariga endi, hozircha, so‘ngra, hanuz, hamisha, doimo, hamon, dastlab, erta-indin, qishin-yozin, kecha-kunduz, kabi ravishlar kiradi.

Harakat-holatning bajarilish yoki bajarilmaslik o‘rinni bildirgan va qayer? so‘rog‘iga javob bo‘luvchi ravishlar o‘rin ravishlari hisoblanadi.

O‘rin ravishlariga olg‘a, ichkari, tashqari singari so‘zlar kiradi.

Harakat va holatning bajarilishidagi miqdor-darajani bildiradigan va qancha? so‘rog‘iga javob bo‘ladigan ravishlar miqdor-daraja ravishlari deyiladi: sal, picha, xiyol, oz, ko‘p, kam, ancha kabi.