Бухоро давлат университети илм ва эзгулик бухоро – 2016

ЭЗГУЛИККА ЕТАКЛАГАН УСТОЗ


Бахшилло Умаров,
педагогика фанлари номзоди, доцент

Устознинг ўрни, мавкеи, ҳурмати асосан унинг билимлари, дунёқараши, тафаккури, касбий малакаси, шунингдек, инсоний фазилатларига караб белгиланади. Устоз, аввалам бор пухта билимларга эга бўлмоғи, ўз навбатида эса шу касбий билим ва кўникмаларини шогирдларига бера олмоғи лозим.

Маънавиятимиз сарчашмаси ҳисобланган муқаддас китоб «АВЕСТО» да ҳаётнинг, тараққиётнинг асосида яхшилик ва ёмонлик нур ва зулмат, ҳақиқат ва ёлғон, гўзаллик ва хунуклик, адолат ва ноҳақлик каби ҳамиша ўзаро курашда бўлган, бир-бирига зид тушунчалар ва ғояларнинг кураши талқин қилинган бўлиб, буларнинг мантиқий ривожи сифатида яхши, доно, устоз-мураббийлар ибрати, устоз ва шогирдлар орасидаги муносабат тасвирланганлиги диққатга сазовордир.
Бунда муаллим ва мударрислар ўз илмини қанчалик билиши касбига муносабати, фидойилиги ўз бурчига, масъулиятига караб яхши ва “ёмон” устозларга ажратилган.
БухДУ педагогика факультети декани, психология фанлари доктори, профессор Шариф Баротов ана шундай ижобий хислатларга бой, фидойи устозлардан ҳисобланади. У киши ҳозирги замоннинг фидоий устози сифатида ўз шогирдларига меҳрибон раҳбар ҳамдир. Вилоятимизнинг қайси бир ўқув юртига бормайлик, Шариф Баротов ҳақида илиқ фикрлар айтилади. Мен Шариф Баротов билан 2002 йилда танишганман. У киши вилоят маънавият ва маърифат бўлими раҳбари бўлиб ишлаган пайтларида биз фикран бирга бўлиб, ўз фаолиятимизни юритганмиз. Вилоят хокимлигининг топшириғи билан шаҳар ва туманларга бирга борганимизда, у инсоннинг ўз ишини севиши, айниқса, ёш авлодни ҳам мафкуравий, ҳам маънавий жиҳатдан етук қилиб тарбиялашда ҳамда ёш шогирдларига психология соҳасининг ютукларини, муаммоларини ечишга амалий ёрдам беришга ошиқади. 2004 йилда мен номзодлик диссертациясини якунлаш арафасида Шариф Баротовдан қимматли маслаҳатлар олиб, ўз ишимни амалга оширганман. Бу устознинг шогирдларга бўлган ғамхўрлиги эди. Ҳозирги вақтда мен Шариф Баротов билан биргаликда сафдош сифатида педагогик фаолият юритмоқдаман. У кишидан таълим-тарбиянинг сирларини, йўлларини ўрганиб келмоқдаман.
Устозлар ҳақида фикр юритилар экан, ҳар биримизнинг кўз ўнгимизда бизга сабоқ берган илмга, маърифатга, эзгуликка етаклаган пок ишларга бошлаган инсонлар намоён бўлади. Шариф Баротов ана шундай устозлар қаторида қолаверади. Устозга сиҳат-саломатлик, оилавий бахт тилайман.