Бухоро давлат университети илм ва эзгулик бухоро – 2016

ИЛМ ФИДОЙИСИ


Д.А.Собирова,
Психология кафедрасининг катта илмий ходим-изланувчиси

Ҳаётда шундай инсонлар борки, уларга интилиб, ҳавас қилиб яшагинг келади. Уларнинг ҳаёт йўлига қараб одамийлик хислатларини англаб етасан, дунёнинг гўзаллиги, инсон қадри, ҳаёт фалсафасини тушунасан. Орамизда шундай инсонлар, шундай устозлар борлиги бизнинг бахтимиз эканлигини англаб етасан.

Шариф Рамазонович Баротов нафақат яхши устоз, балки ҳаётда ҳар тарафлама ибрат бўлувчи яхши инсон ҳамдир. Буни биз ушбу инсоннинг намунавий хулқ, муомала маданияти эгаси, эстетик дидлари, одамийлик сифатларининг ҳар тарафлама мужассамлиги, ундан ташқари раҳбарлик, жиддий, қаттиққўл, ҳаққоний, талабчан раҳбар, ўта масъулиятли инсон сифатида жуда узоқ таърифлашимиз мумкин.
Устознинг касбий профессионал сифатларини таърифлашга келсак, Шариф Баротов психология фанлари доктори, профессор сифатида Ўзбекистонда психология соҳасида олий малакали кадрлар тайёрлашга муносиб ҳисса қўшиб келмоқда. У кишининг раҳбарлигида шу давргача 200 га яқин ёшлар ижтимоий психологиянинг турли муаммолари устида докторлик, номзодлик, магистрлик диссертациялари устида ишлаб келмоқдалар.
Бундай устоз ҳақида гап кетганда ҳар қандай инсоннинг юраги мен шу инсонга кўп нарсадан қарздорман деган фикрдан тошиб тушади. Балки бу - бугунгача касбим шарофати билан озми-кўпми эришган ютуқларимда устознинг ҳам ҳақлари борлигини ҳис қилишдир. Нима бўлганда ҳам йилдан йилга улғайиб, дунёқарашимиз ўзгаргани сайин одамларнинг “Устоз отангдек улуғ” деган нақли замирида кўп ҳикмат борлигига амин бўламиз
Буюклардан бири устози ҳақида гапира туриб “отам мени кўкдан ерга тушишимга сабаб бўлган бўлса, устозим илм-таҳсил бериб, мени кўкка чиқишимга боис бўлди” деган экан.
Тарихга шон-шараф берган буюк давлат арбоблари ҳам улуғ устозлар парваришида етишган эканлар. Бу устозлар ўз тарбиясидагилар қалбига масъулият ва марҳамат туйғуларини жойлаштирганлар. Ушбу инсон менга ишонч билдириб, илк бора мени ишга қабул қилиб, психология сир-синоатларини, психологнинг касб маданияти, умуман ушбу соҳанинг ёзилган ва ёзилмаган қонуниятларини ўргатганлар.
Устоз-кенг фикр эгаси. Барчамизга айтган насиҳатлари ҳеч эсимиздан чиқмайди: доим ҳалол-пок яшаб, ҳамма нарсага ўз тинимсиз меҳнатинг, тиришқоқлигинг эвазига эришгин, деб уқтирадилар.
Биз шогирдлар Ш.Баротовга узоқ умр тилаймиз.