Бухоро давлат университети илм ва эзгулик бухоро – 2016

УСТОЗГА ЭҲТИРОМ


М.Файзиева,
Қарши давлат университети доценти, психология фанлари номзоди

Хаётда ҳар бир кишининг ўз устози йўлбошчиси бўлади. Биз эргашган, бизга ҳар жиҳатдан ибрат бўлган, ҳаётга йўлланма берган, бизни қўллаб- қувватлаган, ёрдам берган, илм йўлида йўналиш бера оладиган ва тиргак бўла оладиган шахс –устоздир.

Узоқ йиллар давомида нафақат илм йўлида, балки ҳаётнинг барча йўналишларида маслаҳатгўйинг ва ҳақиқий устозинг бўлиши қанчалар бахт. Инсон болалигида ўзига яқин дўстни топишга қанчалар қийналса, ҳақиқий устозни топиш бахти ҳам ҳаммага бирдек насиб этавермайди. Мен чин маънода ана шундай бахтга эга бўлган шогирд сифатида азиз устозим Шариф Рамазонович Баратовни эътироф этаман.
Шариф Рамазонович Баратов ўзининг самарали илмий фаолияти давомида меҳрибон устоз, талабчан раҳбар ва бошқа ижобий сифатлар эгаси сифатида нафақат республикамизда, балки хориж илми аҳли орасида ҳам ҳурматга сазовордирлар.
Мен устоз билан 2005 йилда номзодлик диссертациямни ҳимоя қилиш арафасида, тадқиқот ишимга расмий оппонент қилиб белгиланганларида ва шу муносабат билан БухДУга ташриф буюрганимда илк бор ҳамсуҳбат бўлганман.
Эсимда, ўшанда устознинг хузурларига кириш учун эшик олдида анча туриб қолганман (ваҳоланки ўша пайтда устознинг олдиларида хеч ким бўлмаган бўлса-да , ботина олмаганман) ва ниҳоят бир амаллаб ўзимни қўлга олиб, устознинг ҳузурларига кириб, мақсадимни айтганман. Шунда устоз, менга шунчалик яхши муносабатда бўлганларки, илмий соҳадаги суҳбатимиз якунланганидан сўнг у киши ҳақиқий ўзбекларга хос меҳмоннавозлик билан Бухоро шаҳрининг диққатга сазовор жойларини албатта зиёрат қилишимни уқтириб, шогирдларидан бирига тайинладилар.
Устознинг бундай меҳр кўрсатишлари бугунги кунда ҳам давом этиб келаётганлиги мени ниҳоятда қувонтиради ва фаолиятимнинг ҳар бир қиррасида устозимнинг панд- насиҳатларига амал қилиб келмоқдаман.
Мен устозимнинг психология соҳасида самарали меҳнат қилиб , изланиб, олимликнинг барча заҳмати, қувончу ташвишларини бошдан кечирган инсон эканлигини алоҳида таъкидлайман. Устоз, сиз босиб ўтган йўл ибратли ҳаёт йўлидир. Бу йўлда чидам, ҳалоллик, холислик ва садоқат кўрсатган инсонгина саодатга, жамоатчилик, дўсту шогирдлар ва яқинларининг ардоғига сазовор бўлиш бахтига эга бўлади. Азиз устоз! Сизни ҳаётингиздаги улкан сана – таввалуд кунингиз билан самимий қутлайман. Сизга узоқ умр мустаҳкам соғлик, орзуларингиз ижобатини тилайман.