Бухоро давлат университети илм ва эзгулик бухоро – 2016

ОЛИМ, УСТОЗ ВА МУРАББИЙ


Анвар Ҳайдаров,
БухДУ Филология факулътети декани,
филология фанлари номзоди, доцент

Муҳтарам юртбошимизнинг ”Юксак маънавият − енгилмас куч” асарида шундай сатрлар мавжуд: − “ ўз пешона тери билан ҳалол турмуш кечирадиган инсон ҳаётидан мамнун ва рози бўлиб, қалби ва юраги осойишта, виждони пок, руҳий олами барқарор бўлиб, элнинг ҳурматини қозониб яшайди”.

Бухоро давлат университети психология кафедраси профессори, психология фанлари доктори, Педагогика факулътети декани Шариф Рамазонович Баротов ана шундай ибратли ҳаёт кечираётган ҳамкасбларимиздан биридир. Унинг жонкуярлиги ва саъй – ҳаракатлари натижасида кўп йиллардан буён мамлакатимиз илмий жамоатчилиги орасида Бухоро психология мактаби ўз обрў-эътиборини сақлаб келмоқда.
Профессор Ш.Р.Баротов илмий ижодининг катта қисми психология ва психология назариясининг долзарб муаммоларини ҳал этиш ҳамда талабаларни истиқлол ғояси руҳида тарбиялаш, уларнинг маънавий камолотини янада юксалтириш, баркамол авлодни шакллантиришга қаратилган.
Ш.Р.Баротов одамийлик ва олимликни ўзида мужассам этган етук инсондир. У етук психолог олим бўлиш билан бирга, оддий, камтарин, бағрикенг, жонкуяр, меҳрибон ва жуда талабчан. Мен бир ҳамкасб дўст сифатида у киши талабаларга, ўзининг шогирд ва фарзандларига ота-онани, устозни улуғлаш ҳақида таъкидлаганлигини бир неча марта гувоҳи бўлганман. Ҳақиқатдан ҳам устознинг садоқати ва муҳаббатини кўрган ҳар қандай инсон ундан мамнун бўлади. Шу боисдан бўлса керак, устознинг кўпчилик шогирдлари билан яқин бўлганлигим учун улардан устозлари ҳақида илиқ ва самимий фикрларни эшитганман.
Ш.Р.Баротов шогирдларига меҳрибон бўлиш билан бирга, устозларига ҳам ўзларининг садоқати ва муҳаббатини изҳор этишини кўриб чиндан ҳам ҳавас билан қарайман.
Мамлакатимизнинг қайси гўшасига бормайлик, Бухоро психология мактабининг сардори, олим, устоз ва мураббий Шариф Рамазонович Баротов меҳридан, яхшилигидан баҳраманд бўлган инсонлар қучоқ очиб кутиб олишининг гувоҳи бўлганман.
Мен дўстим, ҳаммаслагим ва сафдошим Ш.Р.Баротовнинг илмий, педагогик ва раҳбарлик фаолиятига улкан муваффақиятлар тилайман.