Бухгалтерия ҳисобининг халқаро стандарти 34

БҲХС 34

Бухгалтерия ҳисобининг халқаро стандарти 34
Оралиқ молиявий ҳисоботлар
Мақсади
Ушбу Стандартнинг мақсади оралиқ молиявий ҳисоботнинг минимал таркибини белгилаш ҳамда оралиқ даврга тегишли тўлиқ ёки қисқартирилган молиявий ҳисоботларда тан олиш ва баҳолаш тамойилларини белгилаш ҳисобланади. Мунтазам ва ишончли молиявий ҳисоботлар тадбиркорлик субъектининг фойда ва пул оқимларини юзага келтириш имкониятини, унинг молиявий ҳолатини ва ликвидлилигини тушуниш бўйича инвесторларнинг, кредиторларнинг ва бошқаларнинг қобилиятини оширади.
Қўллаш доираси
1 Мазкур Стандарт қайси тадбиркорлик субъектлари оралиқ молиявий ҳисоботларни чоп этишини, ва ушбу ҳисоботларни неча марта ва оралиқ давр охиридан сўнг қачон чоп этилишини белгиламайди. Бироқ, ҳукуматлар, қимматли қоғозлар бўйича назорат органлари, фонд биржалари ва ҳисоб сиёсатини белгилайдиган ташкилотлар одатда қарз ёки капитал қимматли қоғозлари очиқ бозорда савдо қилинадиган тадбиркорлик субъектларидан оралиқ молиявий ҳисоботларни чоп этишни талаб этадилар. Агарда тадбиркорлик субъектидан Молиявий Ҳисоботларнинг Халқаро Стандартларига (МҲХС) мувофиқ оралиқ молиявий ҳисоботларни чоп этилиши талаб этилганда ёки тадбиркорлик субъекти ўзи танлаганда, мазкур Стандарт қўлланилади. Бухгалтерия Ҳисобининг Халқаро Стандартлари Қўмитаси¹ очиқ бозорда савдо қилинадиган тадбиркорлик субъектлари томонидан мазкур Стандартда белгиланган тан олиш, баҳолаш ва очиб бериш тамойилларига мос келадиган оралиқ молиявий ҳисоботларни чоп этилишини маъқуллайди. Хусусан, очиқ бозорда савдо қилинадиган тадбиркорлик субъектлари томонидан қуйидагиларни амалга ошириш маъқулланади:
(a) камида молиявий йилнинг биринчи ярми якуни бўйича оралиқ молиявий ҳисоботларни таъминлаш: ва
(б) оралиқ давр якунидан сўнг 60 кундан кечиктирмасдан оралиқ молиявий ҳисоботларнинг тайёрланишини таъминлаш.
2 Ҳар бир молиявий ҳисобот, йиллик ёки оралиқ, МҲХСларга мос келиши бўйича алоҳида баҳоланади. Тадбиркорлик субъектининг муайян молиявий йил давомида оралиқ молиявий ҳисоботларни тақдим этмаганлиги ёки мазкур Стандартга мос келмайдиган оралиқ молиявий ҳисоботларни тақдим этганлиги тадбиркорлик субъектининг йиллик молиявий ҳисоботларининг МҲХС га мос келишидан тўсмайди, агарда улар бошқа ҳолларда мос келса.
3 Агарда тадбиркорлик субъектининг оралиқ молиявий ҳисоботи МҲХС га мос келиши таъкидланган бўлса, у мазкур Стандартнинг барча талабларига риоя этиши шарт. Бу борада, 19-банд маълум очиб беришларни талаб этади.