Bugun Buxoro davlat universitetida joriy о‘quv yilining birinchi kuni Mustaqillik darslari bilan boshlandi

Bugun Buxoro davlat universitetida joriy о‘quv yilining birinchi kuni Mustaqillik darslari bilan boshlandi. Iqtisod fanlari doktori, professor, mazkur universitet rektori Obidjon Xafizov Xorijiy tillar fakultetining talabalikka tavsiya etilgan о‘g‘il-qizlari uchun videoroliklar asosida Mustaqillik darsini о‘tdi.

1991-yildan buyon har yili o`tiladigan “Mustaqillik darsi” oʻquv mashgʻulotida О‘zbekiston Respublikasining istiqlolga erishish tarixi, uning mazmun mohiyati, bunyodkor gʻoyalari, hozirgi kuni, istiqboli, so`nggi besh yillikdagi yuksalishlar toʻgʻrisida faktlar orqali aniq va mukammal ma’lumotlar taqdim etildi. Oliy ta’lim tizimidagi tub islohotlar, talabalar uchun yaratilayotgan imkoniyatlar xususida fikr almashildi. Shiddat bilan rivojlanayotgan O`zbekistonda yoshlar uchun berilayotgan imtiyozlar, qo`shma dasturlar haqida atroflicha ma’lumot berildi.

Aytish joizki, bugungi kunda o`z iqtidori va qobiliyatini namoyish etayotgan har bir yosh e’tibordan chetda qolmaydi. O`zlari istagan sohani egallashlari uchun yetarlidan-da ortiq zamin yaratilmoqda. So`nggi yillarda qabul kvotasining oshganligi, BuxDUda yangi yo`nalishlar ochilganligi о‘g‘il-qizlar uchun berilayotgan imkoniyatning amaldagi ifodasidir. Muloqotlar jarayonida ana shu imkoniyatlarga munosib bo`lish, ushbu oliy о‘quv yurtida tahsil oladigan talabalar oldiga qо‘yiladigan talablar, intellektual salohiyat, insoniy fazilatlar haqida tushunchalar berildi.

Yangi O`zbekistonda fidoyi, jonkuyar, eng muhimi, jahon standartiga javob bera oladigan yuksak saviyali pedagog kadrlarni tayyorlash, buning mas’uliyati, majburiyatlari haqida fikrlar bildirildi. Talabalar fikri tinglandi. BuxDUda barcha talabalar uchun jonli va qiziqarli tarzda о‘tilgan Mustaqillik darslari о‘ziga xosligi bilan har yilgidan ajralib turdi.

Shu kunning о‘zida “Mustaqillik darsi”dan so`ng Buxoro davlat universiteti rektori O.X.Xamidov talabalikka tavsiya etilgan о‘g‘il-qizlarning ota-onalari bilan suhbatlashdi. Universitetda talabalarning bilim olishlari uchun yaratilgan sharoitlar, sport bilan shug‘ullanishlari, madaniy-ma’rifiy tadbirlarni tashkil etishdagi imkoniyatlar haqida sо‘zlab berdi. Ota-onalar tomonidan berilgan savollarga atroflicha javob berilgach, eng avvalo, talabalar sog`ligini himoya qilish muhimligi xususida gapirilib, vaksinatsiya jarayonini tashkil etishga alohida urg`u berildi. Kontrakt to`lovlari, talabalar turar joyidan foydalanish masalalari atroflicha tushuntirildi. Samimiy tarzda kechgan suhbat ota-onalarning farzandidan xavotirini biroz pasaytirdi, desak mubolag`a bo`lmaydi. Uzoq hududlardan farzandi bois kelgan ota-onalar universitet rektoriga o`z minnatdorchiliklarini bildirdilar.