Бозор ва тадбиркорлик

9-модда. Давлат тасарруфидан чиқариш ва хусусийлаштириш объектининг сотув нархи
1. Давлат тасарруфидан чиқариш ва хусусийлаштириш объектининг сотув нархини оммавий мулк объектларини тасарруф этувчи белгилайди. Сотув нархини белгилашда объектнинг давлат тасарруфидан чиқариш ва хусусийлаштириш вақтидаги қийматига асосланилади ҳамда давлат тасарруфидан чиқариш ва хусусийлаштириш ўтказилаётган пайтдаги бозорнинг жорий конъюнктураси ва объектнинг қийматига таъсир кўрсатувчи объектив омиллар мажмуи ҳисобга олиниши лозим.
2. Оммавий мулк объекти қийматининг дастлабки баҳоси қонун ҳужжатларида белгиланган тартибда аниқланади (1999 йил 19 августдаги «Бахолаш фаолияти тўғрисда»ги Қонун).
10-модда. Давлат корхонасининг ижарага олинган мол-мулкини сотиб олиш
Ижарачи оммавий мулк объектларини тасарруф этувчининг розилиги билан ўзи ижарага олган мол-мулкини (тўлиқ ёки қисман) сотиб олиши мумкин.
12-модда. Давлат корхоналарини хўжалик жамиятлари ва ширкатларига айлантириш
1. Давлат корхонасини хўжалик жамият ёки ширкатига айлантириш тартиби Ўзбекистон Республикасининг қонунлари билан белгиланади.
2. Қуйидагилар хўжалик жамиятлари ёки ширкатларининг муассислари ёки акциялар (улуш пай) бўлишлари мумкин:
меҳнат жамоасининг аъзолари, Ўзбекистон Республикасининг бошқа фуқаролари, ажнабий фуқаролар ва фуқаролиги бўлмаган шахслар;
Ўзбекистон Республикаси ва бошқа давлатларнинг юридик шахслари;
республика ва маҳаллий давлат бошқарув органлари номидан Ўзбекистон Республикасининг Хусусийлаштирилган корхоналарга кўмаклашиш ва рақобатни ривожлантириш давлат қўмитаси ёки унинг ҳудудий органлари.
13-модда. Оммавий мулк объектини танлов бўйича сотиб олиш
1. Оммавий мулк объектлари танлов бўйича сотилиши мумкин.
2. Танловни ўтказиш шартлари, тартиби ва муддатини оммавий мулк объектларини тегишли тасарруф этувчи тайинлайдиган танлов комиссияси белгилайди.
14-модда. Оммавий мулк объектини ким ошди савдосида сотиш
1. Давлат тасарруфидан чиқариладиган ва хусусийлаштириладиган корхоналарни ким ошди савдосида сотишга қўйиш тўғрисидаги қарорни оммавий мулк объектини тасарруф этувчи қабул қилади.
2. Давлат тасарруфидан чиқариладиган ва хусусийлаштириладиган объектларнинг ким ошди савдосини ўтказиш учун оммавий мулк объектларини тасарруф этувчилар ким ошди савдоси хизматларини ташкил этадилар, бу хизматлар Ўзбекистон Республикаси Вазирлар Маҳкамаси томонидан белгиланадиган тартибга мувофиқ иш кўради.
3. Харидор томонидан сотиб олинмаган объект республика ёки муниципал мулк бўлиб туради. Бундай ҳолларда мулк объектларини тасарруф этувчи корхонани тугатиб, унинг мол-мулкини бўлак-бўлак қилиб сотиб бориш тўғрисида қарор қабул қилиши мумкин.