Bolalar rivojlanishidagi nuksonlarning klinik asoslari

Veber tajribasi (tovush lateralizatsiyasini tekshirish tajribasi). Sado berayotgan C–128 kamertonini bemorning boshi tepasiga qo‘yiladi. Va tovushni qaysi qulog‘i bilan yaxshi eshitayotganini so‘raladi. Tovush o‘tkazuvchi apparat zararlanmagan bo‘lsa (eshituv yo‘lida sera (oltingugurt tiqini) to‘planganda, o‘rta quloq yallig‘langanda), kasal quloq kamerton tovushini yaxshiroq eshitadi. Tovush qabul qiladigan apparat zararlanganda kamerton sog‘lom quloqda yaxshiroq eshitiladi.
Rinne tajribasi (suyak va havo o‘tkazuvchanligini taqqoslash). So‘rg‘ichsimon o‘siqqa qo‘yilgan sado berayotgan C–128 kamertoni eshitilmay qolgach uni quloqqa tutiladi. Bunda tovushning suyakka nisbatan havo orqali uzoqroq eshitilishi ma’lum bo‘ladi (normada suyak orqali taxminan 45 s, havo orqali 85–90 s davo-mida eshitib turiladi). Bu holda, Rinne tajribasi musbat (Rinne +) deyiladi. Musbat Rinne tajribasi qulog‘i normal eshitadigan, tovush qabul qiladigan apparati zararlangan shaxslarda bo‘ladi. Tovush o‘tkazuvchi apparat zararlanganda suyak orqali eshitish havo orqali eshitish bilan bir xil va hatto undan ko‘ra ancha uzoq davom etishi mumkin. Bu holda Rinne tajribasi manfiy (Rinne –) deyiladi.
Shvabax tajribasi. Bu tajribada bemorning suyak o‘tkazuvchanligi (boshning tepa suyagi yoki so‘rg‘ichsimon o‘siqda) bilan tekshiruvchining suyak o‘tkazuvchanligi taqqoslanadi. Tovush o‘tkazuvchi apparat zararlanganda suyak o‘tkazuvchanligi uzaygan, tovush qabul qiladigan apparat zararlanganda esa, qisqargan bo‘ladi. C–4 (sekundiga 2048 marta tebranadi) kamertoni bilan quloqning yuqori tonlarini eshitish qobiliyati aniqlanadi.
Eshitishni audiometrik tekshirish. Eshitishning buzilish xarakteri va darajasi haqida aniqroq ma’lumotga ega bo‘lish uchun audiometriyaning turli usullaridan foydalaniladi (14-rasm). Toza tonlarni chiqaruvchi asboblar yordamida eshitishni tekshirish keng tarqalgan. Havo va suyak telefonlari orqali tekshirilayotgan bemor qulog‘iga turli kuchga va chastotaga ega tovushlar yuboriladi. Bemor aniq eshitgan eng past tovushni belgilash – audiometriyaning asosiy vazifasidir.