Bobur nomidagi andijon davlat universiteti

Mohzoda Begim (XIX asr) - o'zbek shoirasi. Uning yashagan davri va tarjimai holiga oid ma'lumotlar kam saqlangan. Moh-zoda Begimning «Jahona xitob» deb ataluvchi she'ri qo'qonlik ma'rifatparvar shoir Ibrohim Davron (1874-1922) bostirib chiqargan «Ash'ori nisvon» («Ayollarning she'rlari», O'zR FA Sharqshunoslik instituti, inv. №16704) kitobiga kiritilgan. Shoira bu she'rida o'z davridagi xotin-qizlarning ayanchli qismati, ularning huquqsizligi va mudhish hayotini tasvirlab, o'zi yashayotgan tuzumning adolatsizligidan shikoyat qiladi.

Mahzuna. Mehribon mulla Boshmon qizi (XIX asr) - o'zbek shoirasi. Uning hayoti va faoliyati haqida to'la ma'lumot yo'q. Fazliyning «Majmuat ush-shuaro» asarida Mahzuna haqida bunday deyilgan: «U aqlu idrokda Zebunisodek yagona bo'lib, Qo'qonning mashhur shoiralaridandur. Bir oy yuzlining taxallusi Mahzuna bo'lib... Men notavon turli o'y-fikrlar bilan unga qanday g'azallar yubormayin, ul pari chehra menga har baytimga gavhardek pok javoblar qaytarar edi». Mahzunaning devoni haqi­da ayrim ma'lumotlar mavjud bo'lsa-da, hali bu devon topilmagan. Uning Fazliy bilan mushoirasi shoira qobiliyatini namoyish etib turadi, mazmunan dunyoviy g'azallarga hamohang... Erlar bilan ayollar o'rtasidagi har qanday munosabatlar ta'qiqlangan bir davrda shoiraning Fazliy bilan mushoira qilganligi uning ijodiy jasoratidir.

Mahzunaning ayrim g'azallari qo'lyozma bayozlarda uchraydi.