Биринчи қисм

Фойдаланиш қулайлиги – навигация – ўқувчига тақдим этилаётган маълумотни тез ва осон топиш имконини беришни кўзлайди. Яратилган йўлланмалар тизимининг қанчалик қулай ва мукаммал ўйлангани кўзланган мақсадга эришиш йўлида асосий, ҳал этувчи механизмдир. Навигация ўта мураккаб ва чалкаш бўлмаслиги лозим. Оддий йўланмалар орқали ўқувчи истаган мақола ва маълумотга эга бўлишига имконият яратиб бериш кифоя. ОАВ веб-сайти учун саҳифада ўқувчига батафсил маълумот олиш, «принт версия» имкониятларидан фойдаланиш, яъни мақолани чоп этишда қулайлик яратиш, матнга ва архивга кириш техник жиҳатдан чекланмаслиги муҳим бўлган жиҳатлар ҳисобланади.
Интерактив имкониятлар борасида юқорида батафсил маълумот берилгани боис, қуйида фақат ОАВ сайти учун эътиборли жиҳатларига тўхталамиз.
Сўровлар — Интернет форматдаги ОАВ фаолиятида маълумот йиғиш, кичик статистикага эга бўлиш, мавзунинг долзарблигини аниқлаш учун жуда қулай восита ҳисобланади. Сўров шаклида берилган муаммоли савол, аниқлик талаб этувчи вазият олинган натижаларга кўра, таҳлил этилиши ва янги муаммоларни кўтариш имконини яратиши мумкин. Кўп ҳолларда ОАВ веб-саҳифаларида ташкил этилган сўровлар эътиборсиз қолади, ваҳоланки уларнинг натижаларини таҳлил қилиш журналист учун нафақат янги материал устида бош қотиришга туртки, балки аудиториянинг кейинги иштирокини ҳам фаоллаштирувчи омил бўлиб хизмат қилади.
Муаллиф билан алоқа ўрнатиш имконияти. Интернет бу чексиз ижодий сарҳадларни очиб берувчи макон. Интернет нашр учун мақола тайёрлаётган журналист аудитория билан интерактив алоқа ўрнатиш имконига эга бўлса, бу восита унга янги мавзуларни топиш, ёритилган муаммонинг бошқа томонини кўриш, альтернатив фикр ва мулоҳазалар йиғиш имкониятини тақдим этади. Бунда журналистнинг ўз ўқувчилари билан ишлаш йўллари жуда кўп: мақола сўнггида муаллиф электрон манзилига йўлланма бериш, ёритилган масала юзасидан ўқувчиларни форум орқали муҳокамага чорлаш, таҳририят манзилига хат юбориш ва бошқалар. Дунёнинг йирик интернет ОАВ тажрибасида on-line нашр фақатгина журналист ва таҳририят ижодий ходимларининг фаолият маҳсули бўлиб қолмай, аудитория билан бирга ишлаш натижасида, саноқсиз жамоатчи мухбирлар иштирокида яратилаётган оммавий ахборот воситаси бўлиб улгурди.