Bilim sohasi

BOSHQARUVCHI SHAXS – RAHBAR KOMPETENTLIGI

Boshqaruvchi shaxs – rahbar, avvalo, boshqarishdan oldin, albatta, kerakli ilmni egallagan bo‘lishi lozim. Kadrlar tanlash va ularni yanada o‘stirish – bu boshqarishning tashkiliy asosidir.

«Kadrlar tanlashda – vatanparvarlik, xalqparvarlik tuyg‘usi bugun juda katta ahamiyatga egadir»⁸ – deyiladi O‘zbekistonning Birinchi Prezidenti I.A.Karimovning «Buyuk maqsad yo‘lida og‘ishmaylik» asarida.

Kadrlarni tanlash va ularni tarbiyalash umumdavlat xarakterga ega bo‘lib, bu vazifalarni hal etishni ilmiy asosda olib borish kerak. Boshqaruv xodimlarini tayyorlash eng samarali ishlardan hisoblanadi, chunki bu masalani yechib, insoniyat iqtisodiy yutuqlar cho‘qqisiga yeta olishi va kambag‘allik tanazzulidan qutila olishi mumkinligini Konfusiy ikki yarim ming yil oldin ta’kidlagan edi.

Kadrlarni to‘g‘ri tanlashda:

Rahbar qanday bo‘lishi kerak?

“Rahbarlik lavozimiga – mas’ul vazifaga tayinlanadigan odamlardan nimalar talab qilinadi, ular qanday xususiyat va fazilatlarga javob berishi kerakligi haqida ko‘p gapiramiz. Biz ko‘pincha rahbar qat’iyatli, bilimdon va talabchan bo‘lishi kerak, deymiz. Hech shubhasiz, rahbar uchun bu fazilatlar suv bilan havoday zarur. Lekin hozirgi zamonda faqat shularning o‘zi bilan uzoqqa borib bo‘lmaydi.

Rahbar qachon el-yurt ishonchini, e’tiborini qozona oladi? Qachonki yuragi, qo‘li toza, ko‘ngli ochiq, aql va zakovat sohibi bo‘lsa, uning tabiatida qat’iyatlilik bilan bilim, talabchanlik bilan adolat uyg‘un bo‘lsa, u o‘zi boshqaradigan odamlarning g‘am-tashvishlarini o‘z qalbidan o‘tkazishga qodir bo‘ladi. U o‘zining issiq istarasi, muomalasi bo‘ladimi, qandaydir boshqa ijobiy jihati bilanmi, odamlarning e’tiborini o‘ziga tortadigan, bir so‘z bilan aytganda, xalqning ko‘ngliga yo‘l topa oladigan bo‘lishi shart” I.Karimov.

Erkin va faol fikrlash, ta’lim-tarbiya jarayonini modellashtirish, ta’lim berish va tarbiyalashning yangi g‘oya va texnologiyalarini ishlab chiqish va amalga oshirish qobiliyatlariga ega bo‘lgan rahbarning kasbiy kompetentlik darajasini oshirish muammosi zamonaviy, ijtimoiy-iqtisodiy sharoitlarda o‘ta dolzarb hisoblanadi. Hozirgi kunda ta’lim muassasasi rahbar xodimlarining ta’lim sifatini boshqarishning konseptual muhim usullaridan biri kasbiy ta’lim mazmunini modernizatsiyalashda kompetentli yondashuvni amalga oshirishdir.