Bajardi: 201-guruh talabasi Bekchanova Dilnoza

Chingizxon va Oloviddin davlatlarining elchilari savdo karvonlari saflarida bir birlariga borib, ayni vaqtda turli, kerakli ma'lumotlar to'plab, ayg'oqchilik vazifalarini ham bajarardilar. Elchilik munosabatlari 1215 yildan boshlanib, Oloviddin Muhammad dastlab Bahovuddin Roziy boshchiligidagi o'z elchilarini Chingizxon huzuriga yuboradi. Pekinda elchilarni qabul qilgan Chingizxon ularni iliq kutib va ularga o'zaro totuvlik, do'stlikni hamda ikki mamlakatga tegishli hududlarda savdogarlarning erkin qatnovi tarafdori ekanligini bildirdi. 1218 yil bahorida Chingizxon ham qimmatbaho mollar va shohga sovg'alar ortilgan karvonni o'zining eng sodiq odamlaridan biri, xorazmlik savdogar Mahmud Yalavoch boshchiligida Xorazmshoh huzuriga yuboradi. Elchilar Xorazmshohga Chingizxon yuborgan sovg'alarni va nomani topshiradilar. Nomada Chingizxon qudratli Xorazmshoh bilan yaxshi qo'shnichilik, do'stlik, tinchlik haqida shartnoma tuzish niyatida ekanligini va uni eng yaxshi farzandlaridan biri sifatida hurmat qilishini bildirgan edi. Chingizxon nomasidagi keyingi jumla, Xorazmshohning izzat-nafsiga tegishi mumkinligini xayoliga ham keltirmagan bo'lishi mumkin.