Б. Т. Тошмухамедов ўзбекистон Республикаси Олий ва ўрта

Магматик жинсларининг структураси ва тектураси


Магматик жинсларнинг структураси ва текстураси улар­нинг энг муҳим белгиларидан ҳисобланади. Шунинг учун ҳам уларни батафсил таърифлаш муҳим аҳамиятга эга.
Магма жинсларнинг тузилишига структура деб айтилади. Бу эса қуйидаги белгиларга асосланади:
а) кристалланиш даражаси;
б) минерал доналарнинг катта-кичиклиги;
в) минераллар донасининг шакли;
г) минералларнинг бир-бирига бўлган муносабати;
д) кристалларнинг етилганлик (идиоморфизм) даражаси.
Кристалланиш даражасига қараб структура уч хил бўла­ди: тўла кристалланган (жинс фақат кристалл доналаридан ташкил топган); чала кристалланган (кристалланган доналар билан ойна бирга учрайди) ва ойнасимон (жинс фақат ойнадан иборат). Кристаллар мутлақ катта-кичик-лигига қараб қуйидаги турларга бўлинади:

1. 
   Йирик кристалли - 30 мм дан катта;
   
2. 
   Жуда йирик донали – 30-10 мм;
   
3. 
   Йирик донали – 3-10 мм;
   
4. 
   Ўртача донали - 3-1 мм;
   
5. 
   Майда донали - 1 мм дан кам;
   

1. 
   Зич ёки афанит - айрим доналарни лупа билан ҳам
   кўриб бўлмайди.
   

Бу структуралар одатда эффузив жинсларга хосдир.
Тўлиқ кристалланган структура абиссал ёки гипоабиссал шароитларда ҳосил бўлади.
Иккинчи ҳолда (чала кристалланган) жинс кристалланмай қолган масса бўлиб, унинг орасида айрим минералларнинг майда микролитлари яхши кўриниб туради.Улар эффузив ёки гипоабиссал шароитда ҳосил бўлади. Ойнасимони эффузив шароитга хосдир.
Структуранинг хилларини аниқлаб топиш жинснинг ҳосил бўлишини билишда жуда катта аҳамиятга эга. Яъни кристаллар донасининг мутлақ катталиги жинс кристалланган шароитга бевосита боғлиқдир.
Магматик жинсларнинг структураси тасодифий минералга қараб эмас, балки кристалларнинг ўртача катталигига қараб аниқланади. Масалан, жинсда 2 мм ли доналар 4-5 мм ли доналарга нисбатан кўпроқ бўлса, уни ўртача донали жинс деб, аксинча, 4-5 мм ли доналар кўпроқ бўлса - йирик донали жинс деб ҳисоблаш керак.
Кристалларнинг нисбий катта-кичиклигига қараб структуралар тенг донали, турли донали ва порфирли бўладилар. Жинснинг таркибидаги минерал кристаллари тахминан бир хил катталикда бўлса тенг донали, мабодо кристаллар катта-кичик бўлса ҳар хил донали жинс деб юритилади.
Минералларнинг кристаллари катта бўлиб, атрофидаги массадан ажралиб турса, бундай жинслар порфирли жинслар деб юритилади.
Умуман, порфир структура эффузив жинс учун хосдир. Бу жинсларда афонитли ёки жуда майда донали жинслар ичида йирик-йирик доналари ажралиб туради. Бундай структура порфирсимон деб юритилади. Струк­тура ва текстурани ўрганиш магматик жинсларининг ҳосил бўлиш шароитларини аниқлаш ва уларни синфларга тўғри ажратиш учун ёрдам беради.
Интрузив ва эффузив жинслар орасида бир-бирига ўхшайдиганлари ҳам учрайди. Бундай ҳолларда уларни қандай ҳосил бўлганларини аниқлаш анча қийинлашади.
Чала кристалланган текстура фақат эффузив жинсларга хос бўлмай, балки томир, дайка ва лакколит шаклида қотган жинслар учун ҳам хосдир. Ер юзидаги қалин қатламлар орасида интрузив жинслар ҳам учраб қолиши мумкин. Шуни хулоса қилиб айтиш керакки, тўла кристал­ланган аниқ (абиссал) юзага келган интрузив жинсларга хос бўлиб, гипоабиссал интрузив жинсларда анча кам; эффузив жинсларда эса жуда ҳам кам учрайди. Тўла кристал-ланмаган, шишасимон структуралар эффузив жинс­лар учун хосдир. Эффузив жинслардаги порфир структу­ра кўпинча гипоабиссал жинсларда ҳам учрайди.




Расм 31. Эффузив тоғ жинсларининг структура ва текстура-лари: а - порфирли структура, ҳол-ҳол текстура (андезит-порфирит); б - катта порфирли структура, флюидал текстура (липарит).


Магманинг тез қотиши натижасида моддалар тўда кристаллан-ишга улгурмайди ва шишасимон структура ҳосил қилади.
Шишасимон структурага эга бўлган эффузив жинслар чиғаноқсимон синишга эгадир. Вулқон ойнаси обсидиан структурасини эса шишасимон деб юритилади.
Баъзан магматик жинслар пегматит структурали бўладилар. Улар иккита аралашманинг кристалланишидан ҳосил бўладилар. Масалан, кварц билан дала шпати (ортоклаз) бирга ўсганда ана шундай структура пайдо бўлади.
Магма жинсларни биринчи марта микроскопик усул билан кўздан кечирганимизда аниқ кристалланган донадор структурани интрузив жинслар, эффузив жинслар, афанит ёки порфир структурали жинсларни эффузив жинслар деб айтсак катта хато қилмаган бўламиз.
Магма жинслар текстураси зич ёки ғовакли бўла­ди. Зич жинслар бир-бирига ёпишган минераллардан тузилган бўлади. Ғовак жинсларда чуқурчалар, бўшлиқлар ёки оддий кўз билан кўриш мумкин бўлмаган майда ғоваклар, тешикчалар бўлади. Бундай текстура эффузив жинслардан пемза ва шунга ўхшаш жинслар учун хосдир.