Azərbaycan miLLİ elmlər akademiyasi folklor institutu azərbaycan folkloru antologiyasi (Cəbrayıl, Ağdam, Laçın, Qubadlı, Zəngilan, Ağcabədi və Kəlbəcər rayonlarından toplanmış folklor nümunələri) baki – “Nurlan“ – 2012

III mətn

Andranik buna xəbər verir ki, sana bu qədər qızıl verirəm, sən yol ver mən keçim Qarabağa. Sənnən mənim işim yoxdu. Bu tez atı minir gəlir qardaşı Xosrov bəyin yanına. Deyir:

– Sənnən məsləhət almağa gəlmişəm.

Xosrov bəy deyir ki, get allatginən. Qızılı al, denən mənim camahatım hiddətlənər. Topunuzu, tüfənginizi qatırlara yüklüyün, mən sizə yol verəjəm. Qoşunu yığ, arxanı da kəs, qabağı da. Orda bir casus da olur. Andraniki orda tutajaymışdar. Boz atnan çapar gedir ona xəbər verir ki, burdan qaç. Heylə olur qaçır, arxasınca güllə atıllar, dəymir.

Sultan bəy Qala dərəsini ala bilmir, ora kəşfiyyata adam göndərmək istiyir. Qoşunu yığır, deyir, oraya kim gedə bilər? Vağazində Kazım kişi olur, bizim Piçənisdə də Əkbər kişi. Əkbər deyir, mən gedərəm, Kazım da deyir, mən də gedərəm. Camahat deyir ki, bunnar qannıdı, gedə bilməzdər. Sultan bəy buları geri çağıranda başa düşüllər nə üçün onnarı çağırır. Deyillər, bizim bir düşmanımız var, o da ermənidi. Bunnar gedillər ki, Qala dərəsinin qənşərin kəsən bir ermənidi. Əkbərnən Kazım həmən ermənini öldürəllər, onnan ora Sultan bəy Qala dərəsini alır, Şuşanın yolu açılır.

Bərdədə Qılışdı Savalan oluf. Çox gözəl, varrı kişi oluf. Gedirmiş Ağdaşa, bazarrığ eləməyə. Yeməkxananı bağladırmış ki, bu gün Savalan əminin hesabınadı, kim yeyir yesin. Heylə kişi oluf. Sultan bəyin bir sifarişiynən ona köməyə beş yüz altdı göndərmişdi.